Móttökuáætlun

Að byrja í nýjum skóla er börnum oft erfitt en í Kópavogsskóla er leitast við að vanda móttöku nýrra nemenda eins og kostur er. Um leið og foreldri skráir barn í skólann fær viðkomandi deildarstjóri umsóknina til vinnslu og ákveður í hvaða deild nemandinn á að fara. Nemandi og foreldrar eru síðan boðuð á fund til deildarstjóra þar sem farið er yfir upplýsingar um nemandann og sérþarfir hans ef einhverjar eru og síðan er þeim er kynntur skólinn og starfsemi hans. Fundurinn er gjarnan haldinn þegar tilvonandi umsjónarkennari er laus svo hann geti verið með.  Reynt er að hafa kynninguna  seinni hluta dags því þá er áreitið minnst.  Farið er yfir öll þau atriði sem varða skólagöngu nemandans s.s. starfsemi skólans, aðgang að mentor, skólamáltíðir, bekkjarfélaga, stundaskrá, félagsstörf, heimasíðu skólans og annað slíkt. Síðan er gengið um skólann og húsnæðið kynnt með sérstakri áherslu á þau rými sem nemandinn sækir á skólatímanum. Bekkjarfélögum er tilkynnt um komu nýs bekkjarfélaga áður en hann kemur og þau undirbúin fyrir móttöku hans. Nemandinn byrjar síðan skólagöngu sína daginn eftir kynninguna.

Nýbúar

Síðastliðið skólaár byrjuðu margir nýbúar í Kópavogsskóla. Þeim sem eru ekkert talandi á íslensku er beint í nýbúadeildina í Álfhólsskóla. Reynt er að koma til móts við þarfir nýbúa í Kópavogsskóla með stuðningskennslu og aðstoð starfsfólks og nemenda í daglegu starfi. Unnið er að nákvæmri áætlun fyrir nýbúa enda liggur fyrir að þeim fer fjölgandi á næsta skólaári.

Snúbúar

Heitið snúbúi er stundum notað yfir Íslendinga sem eru að koma aftur til Íslands eftir margra ára dvöl erlendis. Sumir þeirra hafa tapað íslenskunni niður og hjá öðrum vantar töluvert upp á orðaforða og hugtakaskilning. Við því er brugðist sem orðalistum og stuðningskennslu ásamt aðstoð starfsfólks og nemenda í daglegu starfi.