Námskrá

Námskrá fyrir 1. bekk Kópavogsskóla 2011-2012

 Umsjónarkennarar eru:

1. P: Ermenga Stefanía Björnsdóttir. Heimastofa er nr.207, á efri hæð skólans.

1. J: Hulda Hrönn Ágústsdóttir. Heimastofa er nr. 209, á neðri hæð skólans.

Samkvæmt viðmiðunarstundaskrá Menntamálaráðuneytis er nemendum í 1. bekk ætlað að vera 30 kennslustundir á viku í skólanum.

Stundaskrár er að finna á mentor.is

Ímyndunarafl er mikilvægara en þekking.

Þekking er takmörkuð en ímyndunaraflið spannar alheiminn (Albert Einstein (1879-1955)).

Námskrá fyrir 2. bekk Kópavogsskóla

2010-2011

Samþætting list- og verkgreina og almennrar kennslu.

Þróunarverkefni

Um verkefnið:

Skólaárið 2011 - 2012 er unnið í 1. bekk að þróunarverkefninu Fjölfærni, samþættingu list- og verkgreina og almennrar kennslu, sem hófst fyrir 3 árum síðan í 1. bekk.

Árið 2006 fengust, að frumkvæði foreldraráðs, loforð um styrki frá ýmsum  fyrirtækjum fyrir þetta verkefni til 2-3 ára og var undirritaður samningur þeirra og skólans 20. nóvember 2007. Tvær greiðslur bárust frá hverju fyrirtæki en óþarfi er að fjölyrða um breyttar aðstæður sem m.a. hafa valdið því að allar forsendur fyrir styrkjum hafa gjörbreyst. Mjög jákvæður afrakstur verkefnisins s.l. skólaár var okkur hvatning til áframhaldandi vinnu með sömu vinnuaðferðum  en í minna mæli, færri tímum,

Markmið verkefnisins var, og er ennþá,  að til verði námskrá fyrir þrjá fyrstu árganga skólans sem hægt verður að nýta til frambúðar með litlum breytingum. Þrátt fyrir að áherslur færist hugsanlega til milli tímabila, eða aðrir þættir breytist lítillega, verður lögð áhersla á að nemendur finni fyrir festu í vinnubrögðum og geti treyst því að nám þeirra sé skipulagt með traustum og öguðum hætti. Foreldrar verða upplýstir um allar meiriháttar breytingar og fá rökstuðning fyrir þeim. 

Stefnt er að því að hafa námsframboð fjölbreytt og þó verkefnin séu þau sömu geta útfærslur verið ólíkar.

Gerður Helgadóttir, deildarstjóri, stýrir verkefninu. Hún vinnur með viðkomandi kennurum að nýrri námskrá og veitir ráðgjöf og leiðsögn við skipulag og kennsluhætti.

Meðfylgjandi námskrá sem unnið verður eftir í 1. bekk á þessu skólaári er afrakstur vinnu umsjónarkennara í 1. bekk, myndlistar-, textíl-, smíða- og tónmenntakennara, og stjórnenda og er framhald vinnu sem hófst vorið 2008 og fólst í gerð námskrár fyrir 1. bekk. Námskráin tekur mið af Aðalnámskrá grunnskóla og markmiðin fléttast saman í list-, og verkgreinum og almennri kennslu eftir þeim verkefnum sem verið er að vinna á hverjum tíma.

Markmiðin með verkefninu eru að:

Styrkja markmið námskrár með því að:

• Auka vægi list- og verkgreina.
• Samþætta námsgreinar svo að saman fari hugur og hönd.
• Auka fjölbreytni í námsframboði svo að nám geti orðið einstaklingsbundnara.
• Styrkja sjálfsmat og líðan nemenda almennt.
• Auka gæði skólastarfs.

Þrengri markmið:

Að nemendur:

• Skynji og læri af reynslu.
• Læri að beita því sem lært er.
• Tjái sig um hugsun sína og álit á hugmyndum (verkum).
• Séu gagnrýnir á hugmyndir og verk en ekki fólk.
• Fái allir tækifæri til að tjá sig.
• Fari eftir leiðbeiningum um rökræður og siðfræði.
• Geti sett sig í spor annarra.

Skipulag

Skólaárinu 2011-2012 er skipt í 3 tímabil:

Haustönn:  24. ágúst - 26. nóvember

Aðalverkefni: Barnið sjálft; heimilið, skólinn, umhverfið, umferðin. Unnið verður með þessi viðfangsefni bæði úti og inni.

Með markvissri vinnu með nemandann sjálfan og umhverfi hans fyrstu mánuðina í skólanum er ætlunin að styrkja líðan  nemenda í skólanum leggja grunn að áframhaldandi skólagöngu þeirra og veita þeim öryggi. Öruggt og traust andrúmsloft ýtir undir að jákvæður starfsandi verður til í kennslustofunni og með því er  lagður grunnur að því að agi í framkomu og vinnubrögðum geti ríkt allt skólaárið og þau skólaár sem eftir koma. Áhersla verður lögð á fjölbreytt verkefni sem reyna á ólíka hæfni og getu einstaklinga og nemendur munu fá þjálfun í að koma fram og tjá sig í orðum og með verkum.

Viðfangsefni nemenda þetta tímabil munu  tengjast námsgreinunum íslensku, samfélagsfræði, náttúrufræði, stærðfræði og list- og verkgreinum. 

Vetrarönn:  29. nóvember til 28. janúar

Unnið verður áfram með barnið sjálft; heimilið, skólinn, umhverfið, umferðin.

Einnig verður unnið með : Árstíðirnar, mánuðirnir, vikur og dagar.

Veðurathuganir gerðar, unnið með mælingar, takt og hrynjandi og grunnformin skoðuð gaumgæfilega.

Í desember fer fram vinna tengd jólum og aðallega verður fjallað um jólahald og  þjóðtrú Íslendinga.

Viðfangsefni nemenda þetta tímabil munu aðallega tengjast námsgreinunum íslensku, samfélagsfræði, stærðfræði og list- og verkgreinum. 

Vorönn: 31. janúar til vors 

Unnið verður áfram með barnið sjálft, umhverfið og umferðina.

Þá tekur við stórt þemaverkefni þar sem margar námsgreinar verða tengdar saman. Áhersla verður á fjölbreytni verkefna sem reyna á ólíka hæfni og getu einstaklinga og nemendur munu fá þjálfun í að rannsaka og túlka. Skynjun- sköpun- tjáning verður yfirskrift þessa tímabils.

Megináherslan þegar líður nær vori verður á fjölbreytta náttúrufræðikennslu. Farið verður í vettvangsferðir  til að veiða síli, skoða fugla, fjöll, fjöruna, safna steinum, jurtum og skordýrum. Unnið verður með afraksturinn á fjölbreyttan hátt.

 

Samskipti og vinnubrögð

Allt skólaárið verður lögð áhersla á að vinna með markmið sem tengjast samskiptum og vinnubrögðum. Í öllum námsgreinum verður haft að leiðarljósi að efla sjálfsmynd og frumkvæði nemenda í gegnum skapandi starf.

Ákveðið var að flokka markmiðin sem unnið er með undir þessum lið í þrennt, sjálfsmynd, tjáningu og tillitssemi/umgengni.

Sjálfsmynd	Tjáning	Tillitssemi/umgengni
Þróa með nemendum forvitni sem stuðlar að frumkvæði og áræðni. Efla vinnusemi, þolinmæði og sjálfsaga. Temja nemendum vönduð vinnubrögð. Kenna nemendum að vinna eftir munnlegum fyrirmælum. Þjálfa nemendur í að fylgja einföldum vinnuferlum og vinnulýsingum. Efla með nemendum löngun til að bæta árangur sinn. Efla með nemendum skilning á hvar þeir geta gert betur. Þjálfa nemendur í að  meta eigin verk og rökstyðja matið. Veita nemendum tækifæri til að velja sér viðfangsefni innan ákveðins ramma.	Gera nemendum kleift að útfæra verkefni á sinn hátt eftir getu. Gefa nemendum tækifæri til að túlka og endursegja viðfangsefni munnlega og skriflega, í leik, myndsköpun, söng, tónlist og með leikrænni tjáningu fyrir bekkjarfélaga. Veita nemendum tækifæri til að tjá hugmyndir sínar og reynslu. Gera nemendum kleift að ræða lausnir á verkefnum við aðra nemendur og við kennarann. Kenna nemendum að setja fram á sjónrænan hátt eigin upplifun eða ímyndun. Veita nemendum tækifæri til að tjá sig frammi fyrir hópi og fá þjálfun í að standa fyrir máli sínu.	Kenna nemendum að þekkja og virða þær reglur sem gilda í kennslustofunni. Kenna nemendum um mikilvægi þess að sýna samnemendum og kennara tillitssemi, kurteisi og virðingu. Kynna nemendum þær reglur sem gilda í samræðum. Gefa nemendum tækifæri til að læra um áhrif góðrar umgengni á endingu hluta. Kenna nemendum að ganga frá vinnugögnum á réttan stað. Kenna nemendum að nýta vel það efni sem unnið er með.

Til að sjálfsmynd nemenda eflist er mikilvægt að þeir fái tækifæri til að byggja á styrkleikum sínum, þeim sé gert ljóst til hvers er ætlast af þeim og þeir fái kennslu í vinnubrögðum og umgengnisreglum.

ÍSLENSKA 

Markmið skólaársins:

Lestur

Að nemendur:

• Fái tækifæri til að vinna með einföldustu einingar tungumálsins bókstafi, hljóð, orð og setningar.
• Læri alla stafi stafrófsins.
• Nái að tengja saman hljóð og geti lesið léttan texta.

Ritun

• Dragi rétt til stafs.
• Læri skriftaráttina.
• Vinni með stafina á ýmsan hátt.
• Tileinki sér að láta stafina sitja rétt á línu.
• Temji sér rétt tak á skriffærum.

Talað mál og hlustun

• Nái betra valdi á hlustun og auki orðaforða sinn.
• Þjálfist í hlustun og endursögn m.a. með því að hlusta á upplestur, sögur, leikrit og ljóð.
• Læri að fylgja fyrirmælum.
• Fái tækifæri til að tjá skoðanir sínar, hugmyndir og reynslu frammi fyrir bekkjarfélögum sínum.

Málfræði

• Nái að tileinka sér hugtökin stór og lítill bókstafur, hljóð, orð og setningar.
• Þekki mun á sérhljóðum og samhljóðum.
• Vinni með rím og orðaleiki.
• Kynnist hugtökunum samheiti, andheiti.

Leiðir:

Nemendur læra hljóð stafanna og læra að tengja þau saman í orð. Röð bókstafanna ræðst fyrst og fremst af bókinni Listin að lesa og skrifa. Nemendur vinna ítarlega með hvern staf, t.d. með því að föndra og leira.

Stefnt er að því að nemendur kunni í lok vetrar heiti stafanna og hljóð þeirra og hafi náð lágmarks lestrarfærni.

Heimalestur verður daglega þar sem nemendur eiga að lesa upphátt fyrir einhvern fullorðinn sem kvittar í þar til gerða bók.  

Ítölsk skrift kennd jafnhliða stafainnlögn. Bókstafirnir eru kenndir með tengikrókum.

Lögð er áhersla á þjálfun fínhreyfinga og frumatriði skriftar með ýmsum æfingum. Einnig að nemendur haldi rétt á skriffærum, temji sér snyrtileg vinnubrögð og sitji rétt við skriftir.

Í ritun og skrift semja nemendur frásagnir og ljóð með aðstoð foreldra og kennara.  Ætlunin er að auka orðaforða barnanna, hjálpa þeim til að skynja hrynjandi málsins og auðvelda þeim lestrarnámið með því að lesa sögur fyrir þau og kenna þeim ljóð og þulur.

Námsefni:

Listin að lesa og skrifa eftir Rannveigu Löve og Arnheiði Borg.

Það er leikur að læra eftir Ragnheiði Gestsdóttur og Ragnheiði Hermannsdóttur.

Lestrarlandið ; textar byggjast á sögum eftir íslenska rithöfunda.

Myndskr:Linda D. Ólafsdóttir

Orðasafnið mitt.

Lestrarbækur við hæfi hvers og eins.

Markviss málörvun.

Sögubókin mín.

Námsmat:

• Fjórar stuttar kannanir yfir skólaárið.
• Stafakönnun/hraðlestrarpróf í lok hverrar annar.
• Skriftarpróf í lok vetrar-og vorannar.

Að auki fer fram símat yfir allt skólaárið. 

 

STÆRÐFRÆÐI 

   

  Markmið skólaársins:

Að nemendur:

• Temji sér vönduð vinnubrögð varðandi framsetningu og frágang verkefna.
• Noti mismunandi hjálpargögn við lausnir verkefna þar sem háar tölur koma fyrir, s.s. smáhluti, kubba, talnagrindur, reiknivélar og skýringamyndir.
• Þjálfist í að skrifa tölur.
• Læri að vinna eftir einföldu vinnuferli sem hefur upphaf og endi.
• Takist á við verkefni þar sem lausnaraðferðir eru ekki augljósar.
• Læri og nýti undirstöðuatriði í stærðfræði og einföldustu táknmál/hugtök hennar.
• Noti vinnu með mynstur til að draga fram almenna reglu.
• Þjálfi form- og rúmskyn.
• Átti sig á að í umhverfinu eru mörg stærðfræðileg viðfangsefni.
• Æfi hugarreikning.
• Vinni með klukku, lesi stundatöflu og dagatal.
• Byggi grunn undir þekkingu á tugakerfinu.

Leiðir:

Kennsla á yngsta stigi byggir á reynslu og þekkingu barnanna þegar þau hefja skólagöngu.

Með tímanum þróast vinna þeirra og leikur þannig að þeim verður tamt að styðjast við stærðfræðileg hugtök. Stuðla ber að slíkri þróun með því að þjálfa börnin í ýmiss konar talnavinnu, flokkun, röðun og lýsingu á eiginleikum hluta og umræðum um þá. Mikilvægt er að tengja verkefnin kunnuglegu umhverfi og nota áþreifanlega hluti eða myndræn hjálpartæki.

Nemendur geta oft unnið með háar tölur og flókin hugtök ef þeir þekkja vel til þeirra eða geta stuðst við hjálpartæki.
Við upphaf skólagöngu er viðhorf nemenda til stærðfræði yfirleitt jákvætt. Hlutverk skólans er að viðhalda því og styrkja það.

Unnið verður með náttúrulegar tölur, tölutáknin 0-100, hugtökin og táknin > < = + - og talnalínuna. Athugun á formum og mynstri, mengi og rökfræði, S og Ó fullyrðingar, fleiri en, færri en, jafnmargir.

Unnið verður með rökkubba, stærðfræðikubba, spil, pinnabretti og ýmislegt annað smádót.

Námsefni:

Kátt er í Kynjadal eftir Guðbjörgu Pálsdóttur.

Sproti 1.

Tölur og talning 1.-4. hefti.

Viltu reyna? (gulur,rauður).

Verkefni fyrir vasareikni 1

Eining 1 og 2 eftir Arne Mogensen og Silla Balzer Petersen.

Ýmislegt annað ítarefni.

KRISTINFRÆÐI, SIÐFRÆÐI OG TRÚARBRAGÐAFRÆÐI

Markmið skólaársins:

Að nemendur:

• Fáist við siðræn viðfangsefni sem tengjast vináttu og merkingu orða eins og rétt og rangt, fyrirgefning, mitt og þitt.
• Geri sér ljóst að engir tveir eru eins.
• Læri að skilja og virða reglur í samskiptum manna, skráðar og óskráðar, og þekkja dæmi þar um.
• Kynnist kristinni sköpunartrú, fæðingu Jesú og læri einfalda jólasálma.
• Kynnist sögum af bernsku Jesú og  afstöðu hans til allra barna.
• Þekki tilefni páskanna.
• Geri sér ljóst hvað bæn er og læri að þekkja bænina Faðir vor og aðrar valdar bænir.

Markmiðið er að börnin kynnist kristinni trú og að til séu önnur trúarbrögð, skoði sig sjálf, umhverfi sitt og samskipti við aðra í ljósi þess. Börnin fást við viðfangsefni sem tengjast markmiðunum. Helstu trúarbrögð kynnt og farið er í heimsókn í kirkju og þar fá börnin að kynnast kirkjusiðum.  Börnin læra bænir og vers.  Verkefni eru aðallega unnin í tengslum við jól, páska og aðra hátíðisdaga.

 SAMFÉLAGSFRÆÐI

Markmið skólaársins:

Að nemendur:

• Kynnist skólanum, skipulagi byggingar og lóðar og nágrenni skólans, bæði manngerðu umhverfi og náttúru, og komi með hugmyndir um hvernig má skoða sig um á markvissan hátt og upplifa og læra um umhverfi sitt.
• Læri að þekkja staði í nágrenni heimilis síns og kunni skil á nokkrum landfræðilegum hugtökum.
• Þekki árstíðirnar fjórar, heiti vikudaga og mánaða, mun á degi, viku, mánuði og ári.
• Skilji mikilvægi fjölskyldu, vina og skólafélaga og gildi þess að vera hluti af hópi.
• Þjálfist í að hlýða reglum í leik og starfi í skólanum.
• Læri hver þjóðhátíðardagur Íslendinga er og að við eigum þjóðsöng og forseta.

Í fyrstu er fjallað um umhverfi skólans og innviði til að hjálpa nýjum nemendum að kynnast hver öðrum, kennaranum sínum, skólabyggingunni og skólalóð. Einnig verður farið yfir það hvernig börnin geti gáð að sér í umferðinni, t.d. með því að læra umferðarreglur og annað tengt umferðinni.

Nemendur læra reglur skólans og þjálfast í að fara eftir þeim, fara í röð og mynda hópa, þjálfa hlustun á leiðsögn og að fara eftir leiðsögn, læra að skrá niðurstöður athugana sinna og þjálfa sig í að segja frá rannsóknum sínum.

Nemendur kynna sér árstíðaskipti  og hvaða breytingar þær hafa í för með sér fyrir daglegt líf þeirra, umhverfi og gróður, kunni að lýsa veðureinkennum og þekkja helstu veðurlýsingatáknin.

Einnig vinna börnin alls kyns verkefni tengd lofti, vatni, sól og jörð.

Námsefni:

Komdu og skoðaðu umhverfið eftir Sigrúnu Helgadóttur.  Aðgát í umferðinni eftir Ástu Egilsdóttur og Jóhönnu Karlsdóttur.

Námsmat:

Byggir á vinnu og frágangi verkefna.

NÁTTÚRUFRÆÐI

Markmið skólaársins:

Að nemendur:

• Öðlist meiri þekkingu á eigin líkama og tilfinningum.
• Beiti heitum og hugtökum yfir sjáanlega líkamshluta.
• Skoði og ræði helstu líffæri og starfsemi þeirra, s.s. hjarta, maga, lungu.
• Geri athuganir á eigin líkama og ræði t.d. hæð, húð, hár, neglur, stærð fóta og handa.
• Ræði um hollustu matar, nauðsyn næringarefna og tannvernd.
• Ræði hvað verður um matinn og að allar lífverur eru búnar til úr frumum.
• Verði áhugasamir um nánasta umhverfi og geri sér grein fyrir ábyrgð hvers og eins á því.
• Kynnist mikilvægi náttúruverndar og því hvaða áhrif maðurinn getur haft á náttúruna, bæði til góðs og ills.

Leiðir:

Efla sjálfsvitund barnanna með því að ganga út frá þeim sjálfum og reynslu þeirra í vali námsefnisins. Efla samkennd barnanna og leggja áherslu á að þau virði hvert annað í leik og starfi.

Námsefni:

Um mig og þig eftir Jóhönnu Einarsdóttur og Ragnheiði Hermannsdóttur. Komdu og skoðaðu líkamann eftir Gunnhildi Óskarsdóttur og Ragnheiði Hermannsdóttur.

Námsmat:

Vinna og frágangur verkefna.

UPPLÝSINGA- OG TÆKNIMENNT

Markmið:

Megin áhersla er lögð  á að nemendur þjálfist í að þekkja skólasafnið  og hvað þar er að finna. Þeir skoða bækur, hlusta á sögur, teikna myndir og læra umgengnisreglur.  Í tölvum kynnast nemendur ýmsum kennsluforritum.

Leiðir:

Nemendur vinna verkefni í stofu, heimsækja skólasafn og kynnast þar umgengnisreglum, einnig verður tölvustofa heimsótt og farið í verkefni tengd námsefni þeirra.. 

Námsmat:

Samkvæmt aðalnámskrá grunnskóla er upplýsinga- og tæknimennt þverfagleg námsgrein og skilar góð færni sér í betri vinnu í öllum greinum.

 

MYNDMENNT

Markmið:

Að nemendur:

• Vinni myndræna frásögn úr nánasta umhverfi, upplifunum og ímyndunum með því að nota á fjölbreytilegan hátt viðeigandi efni, verkfæri og tækni.
• Þekki hugtakið grunnform og geti beitt því í myndgerð.
• Þekki muninn á grunnformum og náttúrulegum formum.
• Þekki frumlitina og geri einfaldar litablöndur.
• Þekki mismunandi myndgerðir með tilliti til tækni, t.d. málverk, teikningu, þrykk, ljósmynd, styttu.
• Þekki hugtakið myndbygging og viti hvað er nálægð og fjarlægð.
• Skilji mikilvægi þess að ganga vel frá verkefnum, efnum og áhöldum.
• Geri sér grein fyrir verðmæti þeirra efna og áhalda sem unnið er með hverju sinni.
• Þekki mismunandi myndir í umhverfi sínu.
• Lýsi myndverki og skoðun sinni á því.
• Geti fjallað um hvaða gildi myndverk getur haft fyrir hvern og einn.

Námsmat:

Metin verður ástundun, verkefni og virkni hvers nemanda.

LÍFSLEIKNI

Markmið skólaársins:

Að nemendur:

• Eflist í  tilfinningaþroska og samskiptahæfni.
• Læri að bera virðingu fyrir sjálfum sér, öðru fólki og umhverfi sínu.
• Þekki reglur sem gilda í samræðum í hóp (rétta upp hönd, ekki grípa fram í o.fl.).
• Fái tækifæri til að tjá sig fyrir framan bekkjarfélaga sína.

Verkefni eru í formi leikja, umræðna og sköpunar og leitast er við að allir í hópnum fái notið sín.

Námsefni:

Spor 1,Uppeldi til ábyrgðar-uppbygging sjálfsaga.

Námsmat: 

Vinna og frágangur verkefna.

HEIMILISFRÆÐI

Markmið:

Að nemendur:

• Geti borið saman hollar og óhollar fæðutegundir.
• Kynnist einföldum áhöldum og þekki dl-mál, msk. og tsk.
• Fái verklega þjálfun í eldhúsi miðað við aldur og hjálpi til við frágang.
• Læri nöfn helstu fæðuflokka og tegunda og geri sér grein fyrir hvaðan matvælin koma sem unnið er með.
• Þekki mikilvægi handþvottar, hreinlætis í eldhúsinu og viti um örverur í umhverfi okkar.
• Fræðist um hvernig bæta má umhverfið (sápa, vatn, einnota umbúðir og pappír).
• Læri að lesa myndrænar uppskriftir og geri sér grein fyrir hvaða heimilisstörfum þeir eru færir um að taka þátt í.

Leiðir:

Sýnikennsla. Nemendur fá þjálfun í verklegri vinnu og í því að halda öllu snyrtilegu. Þjálfun í að þvo upp, hreinsa áhöld og ganga frá eftir sig með leiðsögn. Áhersla er lögð á góða borðsiði.

Námsgögn:

Heimilisfræði fyrir byrjendur og ljósrit úr eldra efni. Fæðudúkur.

Námsmat:

Óformlegt námsmat í kennslustundum með athugun á vinnu, virkni og ástundun nemenda. TEXTÍLMENNT

Kennari . Margrét Inga Bjarnadóttir

Markmið:   

Að nemendur:

• Þjálfist í fínhreyfingum.
• Læri hugtök sem tengjast textílmennt
• Þjálfist í að klippa.
• Þjálfist í að nota flatt form.
• Þjálfist í að teikna/mála/lita í tengslum við textílverkefni.
• Læri að þræða nálar.
• Læri auðveld útsaumsspor.
• Þjálfist í auðveldum vefnaði og búi til efni.
• Fái innsýn í hvernig textílverk verður til á einfaldan hátt.

Leiðir:

Kennari sýnir nemendum þær aðferðir sem henta hverju sinni.

Námsmat:

Metin eru verkefni og virkni hvers nemanda.

HÖNNUN OG SMÍÐI

Markmið:

Að nemendur:

• Verði virkir í  námi sínu í smíðastofunni.
• Hafi gagn og gleði af þessum tímum.
• Læri meðferð þeirra verkfæra sem þeir koma til með að nota.
• Geri sér grein fyrir hættum í smíðastofunni.
• Þekki umgengnisreglur.

Leiðir:

Nemendur leysa einföld verkefni á sjálfstæðan hátt og nýta eigin hugmyndir við vinnu sína. Þeir ganga frá þeim verkfærum sem þeir nota. Þeir vinna gripi við  sitt hæfi og getu.

Námsgögn:

Verkefnabanki smíðakennara.

Námsmat:  

Samkvæmt námskrá eru þessir þættir teknir til athugunar:

Umgengni og hegðun.

Virkni og vinnubrögð nemandans.

Lokaafurðir nemandans.

TÓNMENNT 

Markmið:

Að nemendur:  

• Læri að syngja og spila einföld lög.
• Geti notað röddina til hljóð- og tónsköpunar.
• Geti notað röddina til að flytja þulur og raddverk.
• Geti sungið hreint með skýrum framburði.
• Geti leikið á einföld hljóðfæri (skóla- og heimasmíðuð).
• Tileinki sér þekkingu á íslenskum tónlistararfi.
• Geti beitt frumþáttum tónlistar í einföldum hljóðfæraleik.
• Þekki og geti sungið nokkra árstíðabundna söngva.
• Semji tónlist, hljóðsetji út frá myndum, táknum, sögum og ljóðum.
• Leiki undir á hljóðfæri og spili eigin hljóðfæraútsetningar og annarra.  
• Kynnist helstu hljóðfærum heims og þekki helstu hljóðfæraflokka eftir sjón og heyrn.
• Fræðist um tónlist og auki þekkingu sína á ýmsum fyrirbærum tónlistar.
• Hlusti á fjölbreytta tónlist, ræði um hana og skilgreini.
• Geri sér grein fyrir stöðu og hlutverki tónlistar í samfélaginu.  
• Þjálfi með tónlistarleikjum frumþætti svo sem hryn, laglínu, blæ, styrk o.fl.
• Þekki algengustu samspilshópa (sinfóníuhljómsveit, lúðrasveit o.fl.).
• Þjálfist í að rökstyðja eigin skoðanir á tónlist.
• Geti fylgt stjórnanda í hljóðfæraleik.
• Sýni fram á með hreyfingu að þeir skynji frum- og efnisþætti tónlistar og geti tekið þátt í hreyfileikjum og dönsum.                                                                

Námsefni:

Útgefið námsefni frá Námsgagnastofnun, vinnubókarblöð frá kennara og ýmislegt fleira.

Tæki og hjálpargögn: 

Ýmis hljóðfæri, fjölbreytt hlustunarefni, tölva og skjávarpi.

Námsmat: 

Metinn er frágangur vinnubókar, þátttaka í söng, hópvinnu, samspili og hlustun.

ÍÞRÓTTIR  

Markmið:

Fyrstu skólaárin hafa börn yfirleitt mikla hreyfiþörf, gleðjast yfir hverjum leik og eru með rannsóknarhug. Við skipulagningu kennslunnar þarf að koma til móts við þessa þætti. Leikir og markvissar æfingar, sem stuðla að eflingu skynfæra líkamans og styrkja gróf- og fínhreyfingar, eru þættir sem skipa stóran sess í íþróttakennslu fyrstu skólaárin. Þá skal einnig tengja áðurnefnda þætti við markvissa uppbyggingu á almennri líkamshreysti og þreki.  Á fyrstu skólaárunum læra börnin smám saman að öðlast stjórn á líkama sínum og mótast sem heilsteyptir einstaklingar. Því þarf að leggja ríka áherslu á að þau öðlist jákvætt viðhorf til hreyfingar og að sjálfsmynd þeirra eflist með þátttöku í leikjum og fjölbreyttri hreyfingu.

Helstu viðfangsefni eru: Grunnþjálfun, ýmsir leikir og æfingar, þrautabrautir, hringþjálfun, knattleikir og æfingar með bolta, fimleikar, frjálsíþróttir, útivera, stöðvaþjálfun, teygjur og slökun.

Námsgögn:

Bækur og rit um íþróttir, líkamsrækt og leiki.  Ýmsir boltar og ýmis áhöld stór og smá.

Námsmat:

Engin formleg próf eru í íþróttum í 1. bekk.

Námsmat byggist aðallega á huglægu mati, þ.e. metinn er áhugi nemenda, virkni þeirra í tímum, hegðun og framkoma.

Íþróttafatnaður:

Í útileikfimi er áríðandi að nemendur komi í fötum sem þægilegt er að hreyfa sig í. Þegar nemendur byrja inni í sal er eftirfarandi klæðnaður nauðsynlegur fyrir 1. - 3. bekk: stuttbuxur, stuttermabolur/leikfimibolur, fimleikaskór (tátiljur), handklæði og hárbursti.

Nemendur 1.-3. bekkjar mega ekki vera í íþróttaskóm í leikfimi. Leyfilegt er að vera  í tátiljum.

Sund

Markmið:

Í 1. bekk  er lögð megináhersla á aðlögun barnanna að vatninu í leik og með æfingum í leik. Mikilvægt er að þau fái jákvæða upplifun í kennslustundum og njóti þess að sækja sundtíma.  Nemendur læri að tileinka sér hreinlæti fyrir og eftir sundkennslu og fari eftir bað- og umgengnisreglum sundstaða. 

Leiðir:

Kennari fylgir nemendum í grynnri enda laugar.  Kennari er ýmist ofan í lauginni eða á bakka og stjórnar æfingum og leikjum.  Þeir nemendur sem eru vatnsfælnir fá æfingar við sitt hæfi við eða nálægt bakka. 

Námsgögn:

Bækur og ljósrit í eigu kennara.  Korkur og ýmis smááhöld. 

Námsmat:

Próf: Nemandi hafi tök á fjölbreyttum æfingum s.s.:

Öndunaræfingum inn- og útöndun 10 sinnum.

Flotæfingum á bringu og baki, með eða án hjálpartækja.

Bringusundsfótatökum við bakka, með eða án hjálpartækja.

Skriðsundsfótatökum við bakka, með eða án hjálpartækja.

Göngu með andlit í kafi  2-2,5 metra.

Námsmat byggist á frammistöðu í prófi.  Nemandi fær umsögnina lokið eða ólokið.

Sundfatnaður:

Áríðandi er að nemendur mæti í sundfötum sem gott er að synda og hreyfa sig í.  Æskilegasti fatnaður er sundskýla og sundbolur ekki sundbuxur eða bikiní. Annar útbúnaður er handklæði og hárbursti og ef þurfa þykir sundhetta og /eða sundgleraugu.  

Tímabil: 23. mars - 25. maí 

Um námsmat Í aðalnámskrá kemur m.a fram um námsmat að það fari ekki eingöngu fram í lok námstímans heldur er það einn af föstum þáttum skólastarfs, órjúfanlegt frá námi og kennslu. Mat á námi og framförum á að vera hluti skólastarfsins. Með námsmati á að reyna að komast að því hvort nemandi hefur náð þeim markmiðum sem að er stefnt eða hversu vel hann hefur nálgast þau. Þar sem markmiðin eru margvísleg og hægt að fara ýmsar leiðir til að ná þeim er augljóst að matsaðferðir verða að vera fjölbreytilegar. Þær verða að hæfa markmiðunum og endurspegla áherslur í kennslu. Þess er enginn kostur að meta námsgengi og framfarir eingöngu með prófum og öðrum formlegum aðferðum og þegar viðfangsefni eru jafn margsvísleg og hér er stefnt að verður námsmat að vera fjölbreytt. Niðurstöður námsmats verða því að byggjast jöfnum höndum á óformlegu mati kennara og á formlegum aðferðum, s.s. prófum og könnunum. Hafa verður hugfast að sum markmið eru þess eðlis að ekki kemur fram fyrr en seinna í lífinu hvort þeim varð náð eða ekki.

Kennarar munu nýta  sérstök námsmatsviðmið í nokkrum þáttum sem tengjast vinnubrögðum og umgengni. Þau viðmið verða þrepaskipt og ekki verður ætlast til að allir nemendur raði sér á sama þrep í lok tímabilsins enda eru þeir ekki allir staddir á sama þrepi í upphafi.

 

Verkefni   __________________

Nafn nemanda:   ________________________________________Bekkur ______________

Vinnubrögð
Fyrirmæli	Þarf einstaklingsfyrir-mæli varðandi flóknari hluti en nær hópfyrirmælum um einfaldari hluti.	Tekur til sín  fyrirmæli sem sögð eru yfir heilan hóp og fer eftir þeim undir eftirliti fullorðinna.	Fer eftir fyrirmælum og getur nýtt þau við ólíkar aðstæður.
Vinnusemi	Vinnur vel undir eftirliti  fullorðinna og með aðstoð við skipulag vinnu sinnar.	Kemur sér að verki án aðstoðar en truflast af og til við  áreiti.	Gengur ákveðið til verks og heldur sér að verki þar til verkefni er lokið.
Verklag	Vinnur verkefni hægt. Þarf aðstoð við að ljúka flestum þeirra.	Leggur sig fram um að ljúka verkefni.	Vandar vinnu sína.
Sjálfstæði	Nær sér í aðstoð án þess að reyna  fyrst sjálf/ur.	Reynir að leita lausna áður en kennari er kallaður til.	Leitar sjálfur lausna .Sækir aðstoð hjá kennara eða öðrum þegar  nauðsynlegt er.

 

Beiting
Blýantur	Þarf aðstoð við grip.	Beitir blýanti laust/fast með réttu gripi.	Beitir blýanti áreynslulaust með réttu gripi.
Skæri	Á erfitt með að fylgja línum.	Klippir  pappír af nokkru öryggi.	Beitir skærum áreynslulaust á pappír og tau.
Önnur áhöld	Þarf aðstoð við grip	Beitir áhöldum af nokkru öryggi.	Beitir áhöldum áreynslulaust.

Upplýsingar til foreldra:

Upplýsingar um nöfn kennara árgangsins, netföng, símanúmer og viðtalstíma ásamt

upplýsingum um matarkaup, gæslu eftir skóla og forfallatilkynningar finnast á heimsíðu skólans, http://www.kopavogsskoli.is.

---