Námsrká

10. bekkur 2011-2012

Umsjónarkennari bekkjarins er Birna Vilhjálmsdóttir.

Heimastofa er st. 221 á efri hæð skólans.

Samkvæmt viðmiðunarstundaskrá Menntamálaráðuneytis er nemendum í 10. bekk ætlað að vera 37 kennslustundir á viku í skólanum.

Stundaskrár bekkjanna er að finna á mentor.is

ÍSLENSKA

Kennari: Gróa Grétarsdóttir

Markmið:

Byggt er á Aðalnámskrá grunnskóla sem í stuttu máli miðar að því að auka færni nemandans í íslensku almennt, þ.e. í töluðu máli, lestri, hlustun og ritun og efla með nemandanum skilning á sögulegu og menningarlegu gildi íslenskrar tungu og bókmennta.

Leiðir:

Unnið er í lotum og er námsefni vetrarins skipt niður í 8 þriggja vikna lotur sem hver hefur sínar áherslur og eina upprifjunarlotu.

Bókmenntir og ritun:

Lesin verður skáldsagan ,,Englar alheimsins" eftir Einar Má Guðmundsson, auk kjörbóka, smásagna og greina. Einnig er lesin Gíslasaga Súrssonar. Verkefnavinna: ritunar æfingar, útdrættir og endursagnir úr lesnu og ólesnu efni. Unnið með ljóðahugtök, ljóð lesin og ort.

Bókmenntaritgerð og bókarkynningar eru unnar í tengslum við lestur skáldsagna.

Í ritun er lögð áhersla á að nemendur geti byggt upp sjálfstæða frásögn, sagt frá persónulegri reynslu og rökstutt skoðanir.

Nemendur eru þjálfaðir í framsögn með upplestri á sögum, ljóðum, upplestri ritgerða og öðru efni sem þeir semja sjálfir.

Foreldrar eru hvattir til að örva börn sín til lesturs góðra bóka. Lögð er áhersla á að nemendur skili verkefnum vel rituðum og frágengnum.

Málfræði og stafsetning: Í málfræði er unnið með grundvallaratriði og grunnur lagður að færni nemenda í beygingafræði orðflokka. Sérstök áhersla er lögð á beygingu fallorða og skilning á einkennum helstu orðflokka, orðflokkagreiningu. Reynt er að tengja málfræðireglur stafsetningunni og mikið unnið af málfræði- og stafsetningaræfingum. Málfarsverkefni eru í hverri lotu. Í stafsetningu er lögð áhersla á þjálfun grundvallaratriða með skriftarvinnu.

Námsefni:

Skerpa 3, 8 lotubundin vinnuhefti: Mályrkja I, lestrarbók. Skriffinnur, Gíslasaga Súrssonar,Englar alheimsins, kjörbækur, Ljóðspeglar og Málfinnur.

Námsefni af vef. Upprifjunarhefti.

Mat:

Unnið er í lotum. Nemendur skila öllum verkefnum í lok lotu og taka próf. Einkunn hverrar lotu er meðaltal verkefna og vinnu í tímum ( 40%) og prófs (60%). Hver nemandi er með sína viðmiðunareinkunn sem hann ákveður í samráði við kennara í upphafi skólaárs og einsetur sér að ná henni á lotuprófi.

ENSKA

Kennari: Ásdís Óskarsdóttir

Markmið:

Að nemandi:

Öðlist nægan orðaforða til að geta lesið almenna texta, t.d. í dagblöðum og tímaritum og einnig bækur sér til gagns og ánægju.
Geti skrifað ýmsar gerðir texta með hefðbundinni uppbyggingu og beitt helstu málfræðiatriðum.
Geti skilið almennt talað mál og tjáð sig um kunnugleg málefni, einnig flutt stutt erindi og gert grein fyrir skoðun sinni.
Geti fylgst með ýmiss konar efni í ljósvakamiðlum, sjónvarpi og útvarpi, og öðlist skilning á ýmsum þáttum í menningu og þjóðlífi enskumælandi landa.
Kunni að nota sér upplýsingatækni við námið og helstu hjálpargögn.

Námsefni:

Kennslugögn: New Matrix Intermediate, lestrar- og vinnubók með geisladiski. Ýmis málfræðiverkefni og textar sem kennari útbýr. Nemendur lesa bækur að eigin vali og skila skriflegum umfjöllunum um þær.

Heimanám:

Ætlast er til heimavinnu fyrir hvern tíma. Áætlunin er birt á Mentor.

Námsmat:

Umsögn er fyrir haustönn. Próf í lok haust- og vorannar 70%, ritgerðir 20%, ástundun og vinnubrögð 10%. Vorannarpróf er munnlegt.

DANSKA

Kennari: Ásdís Óskarsdóttir

Markmið:

Að nemandi:

Öðlist aukna málvitund í dönsku með lestri, hlustun, ritun og talæfingum.
Geti lesið í ólíkum tilgangi, til gagns og ánægju, og beitt ólíkum lestraraðferðum (leitarlestur, yfirlitslestur, hraðlestur og nákvæmnilestur).
Skilji heildarinntak í munnlegum frásögnum og samtölum tveggja um efni almenns eðlis sem hæfir aldri hans og þroska.
Geti hlustað eftir og skilið smáatriði í samtölum, tilkynningum og frásögnum þar sem nauðsynlegt er að skilja til fullnustu það sem sagt er.
Geti óundirbúið tekið þátt í samræðum við ólíka viðmælendur um efni sem hann þekkir, hefur áhuga á eða sem tengist daglegu lífi.
Geti sagt nokkuð lipurlega frá ýmsu sem hann hefur áhuga á og haldið rökréttum þræði í frásögninni.
Geti skrifað samfelldan texta með einföldum aukasetningum og beitt meginreglum um málnotkun.
Þekki og geti notað rétt helstu málfræðihugtök.
Kunni aðferðir til þess að auka orðaforða sinn á markvissan hátt og viti hvernig hann getur stuðlað að eigin framförum í málanáminu.

Leiðir:

Verkefni bæði úr útgefnu námsefni, töluðu og rituðu, heimatilbúnu efni og af netinu. Nemendur hlusta á dönsku, lesa og þýða á eðlilega íslensku, lesa og skilja heildarinntak texta, vinna vinnubók og skrifa texta. Lögð er áhersla á að nemendur tjái sig sem allra mest á dönsku. Gagnvirk verkefni unnin í tölvu. Þau lesa bækur að eigin vali og skila skriflegum umfjöllunum um þær. Ritgerðir unnar og annaðhvort fluttar fyrir samnemendur eða skilað til kennara.

Námsgögn frá Námsgagnastofnun:

Kennslubókin Ekko, höfundar eru Ásdís Lovísa Grétarsdóttir og Erna Jessen. Námsefnið samanstendur af grunnbók, vinnubók og hljóðsnældu. Verkefnin skiptast í lestur texta, hlustunaræfingar, samtalsæfingar og skrifleg verkefni. Bókinni er skipt í átta þemu: Skoleliv, Sport og motion, Spis dig glad, Livsstil, Kriminalitet, Kommunikation,Du og jeg og Fremtidsdrömme.

Grammatik, handbók um danska málfræði eftir Arnbjörgu Eiðsdóttur og Kristínu Jóhannesdóttur með málfræðiverkefnum.

Heimavinna:

Gert er ráð fyrir heimavinnu fyrir hvern tíma. Áætlunin er birt á Mentor.

Námsmat:

Umsögn er fyrir haustönn. Próf í lok haust- og vorannar 70%, ritgerðir 20%, ástundun og vinnubrögð 10%. Vorannarpróf er munnlegt.

SAMFÉLAGSFRÆÐI

Kennari: Signý H. Helgadóttir

Markmið:

Nemandi á að:

Skoða möguleika Íslendinga í byrjun 20. aldar.
Kynna sér gang seinni heimsstyrjaldarinnar út frá völdu sjónarhorni, t.d. um hlutskipti einstakra landa, Gyðingaofsóknir eða andspyrnuhreyfingar.
Skilja hvað felst í lýðræðislegum vinnubrögðum og stjórnarháttum.
Öðlast þekkingu og skilning á mismunandi lifnaðarháttum og menningu fólks á jörðinni.
Geta aflað sér upplýsinga um tiltekið efni og unnið úr þeim.
Geta tjáð sig í umræðum.
Þekkja sjálfstæðisbaráttuna á Íslandi og geta tengt hana við hugmyndastrauma síns tíma.
Þekkja til nokkurra forystumanna í þjóðlífi 19. aldar á Íslandi, einkum Jóns Sigurðssonar.
Þekkja til fyrstu áfanga lýðræðis og jafnréttis á Íslandi og geta borið saman við grannlöndin.

Námsgögn og leiðir:

Úr sveit í borg eftir Guðmund Guðmundsson. Þjóðfélagsfræði eftir Garðar Gíslason. Unnin hópverkefni og horft á myndbönd, heimildaritgerð og valverkefni sem tengjast sögu eða þjóðfélagsfræði.

Námsmat:

Annapróf 60%. Könnunarpróf og vinna í tímum 25%. heimavinna 15%.

LÍFSLEIKNI

Kennari: Guðný Sigurjónsdóttir

Markmið:

Nemendur:

Styrkist í að vernda persónuleg og tilfinningaleg mörk sín gegn óæskilegu áreiti og misbeitingu.
Læri að vega og meta hvort einhver samskipti og hegðun falli utan þess ramma sem lög og reglur setja.
Læri að íhuga á gagnrýninn hátt langanir sínar, væntingar og sérstöðu til að öðlast aukna sjálfsþekkingu.
Verði meðvitaðir um rétt sinn til að halda draumum sínum og skoðunum fyrir sig og rækta lífsgildi á eigin forsendum.
Skynji félagslegar aðstæður til að geta metið hvort og hvernig þeir gerist þátttakendur í þeim, t.d. að standast þrýsting til að gera eitthvað gegn betri vitund.
Öðlist færni í ópersónulegum samskiptum.
Samspil samfélags, umhverfis, náttúru og menningar.
Þekki hættur samfara neyslu ávana- og fíkniefna.
Viti hverjir eru helstu áróðursmiðlar nútímans.
Geti greint frá hlutverki löggjafarvalds, dómsvalds og framkvæmdavalds.
Séu meðvitaðir um gildi löggæslu til að halda uppi lögum og reglu.
Þekki helstu stofnanir sem þjóna landsmönnum.
Geti rætt um þætti sem kunna að stuðla að velferð þjóðarinnar og alls mannkyns.
Geti metið hvaða skyldur og ábyrgð þeir bera gagnvart samborgurum sínum og efli með sér borgaravitund.
Geti gert kostnaðarreikning um fastar greiðslur heimila.
Séu meðvitaðir um félagslega og siðferðilega ábyrgð sem neytendur.

Námsgögn:

Bókin ,,Leið þín um lífið-siðfræði fyrir ungt fólk." notuð sem grunnbók, námsefni úr ýmsum bókum, blöðum/tímaritum, af netinu, úr sjónvarpinu o.fl. (eftir því sem við á hverju sinni). Fyrirlestrar um brýn málefni t.d. fjármál,kynfræðslu o.fl.

Leiðir:

Nemendur ræða saman og tjá sína skoðun á efninu. Einstaklingsvinna með áherslu á sjálfstæð vinnubrögð og gagnrýna hugsun. Hópavinna, þjálfun í að vinna með öðrum. Tölvunotkun.

Námsmat:

Námsmatið byggist á símati þ.e. frammistöðu nemenda í tímum (virkni þeirra í umræðum) ásamt verkefnum 40%. Próf í lok vetrar 60%.

STÆRÐFRÆÐI

Kennari: Margrét Ísleifsdóttir

Markmið:

Að nemendur:

Fáist við stærðfræðileg hugtök og læri að nota táknmál stærðfræðinnar.
Nái það góðum tökum á stærðfræði að hún nýtist þeim í daglegu lífi, tómstundum og öðru námi.
Nái það góðum tökum á stærðfræði að hún nýtist þeim í framhaldsnámi.
Þjálfist í að tjá sig á máli stærðfræði bæði munnlega og skriflega.
Geri sér grein fyrir að skýr og rökræn framsetning er mikilvæg vinnuaðferð í stærðfræði.

Efnisþættir sem verða sérstaklega teknir fyrir í vetur:

Tölur og talnafræði, reikniaðgerðir, reiknikunnátta og mat, hlutföll og prósentur, rúmfræði, algebra, líkindareikningur og tölfræði. Ásamt upprifjun frá fyrri árum.

Námsefni:

Stærðfræði Átta-tíu, bækur 5 og 6, höfundar Guðbjörg Pálsdóttir og Guðný Helga Gunnarsdóttir.
Almenn stærðfræði III. Eftir Björk, Björksten, Brolin, Ernestam og Ljungström. Ýmis verkefni frá kennara.
Gagnvirk forrit frá Námsgagnastofnun, stærðfræðivefurinn rasmus.is o.fl.

Námsmat:

Símat 40% sem byggist á skyndiprófum og vinnu í tímum 25%, .heimanám 15% og annarpróf 60%.

NÁTTÚRUFRÆÐI

Kennari: Sigurður Þorsteinsson

Eðlisfræði

Markmið:

Að nemendur:

Geti lýst orsökum hreyfinga og notað hugtökin ferð, hraði, hröðun og kraftur.
Þekki þyngdarlögmálið og skilji muninn á massa og þyngd.
Geti notað hugtökin þrýstingur og eðlismassi og tengt þau fyrirbærum í daglegu lífi.

Kennslubók: Kraftur og hreyfing. Hálfdán Ómar Hálfdánarson þýddi og staðfærði.

Kennslutilhögun: Bókleg og verkleg kennsla, auk vettvangsferða.

Námsmat: Vinnubók og vinna í tímum 40%. Lokapróf 60%.

Líffræði

Markmið:

Að nemendur:

Geti lýst hlutverki erfðaefnisins DNA, gena og litninga.
Geti útskýrt erfðir blóðflokka manna og kynbundnar erfðir.
Geti beitt hugtökunum ríkjandi og víkjandi gen, arfhreinn og arfblendinn.
Kynnist hugtökum Mendels.
Geti lýst fjölbreytni í erfðum og átti sig á klónun og geti nefnt dæmi um slíkt.
Geti tekið þátt í siðferðilegum umræðum um kynbætur, erfðalækningar og þess háttar.

Kennslubók: Erfðir og þróun. Þuríður Þorbjarnardóttir þýddi og staðfærði.

Kennslutilhögun: Fyrirlestrar, umræður og verkefnavinna.

Námsmat: Tímavinna, vinnubók og heimavinna 40%. Próf 60%

ÍÞRÓTTIR

Kennari: Ragnar H. Róbertsson

Á unglingastigi er nauðsynlegt að tengja íþróttakennsluna í auknum mæli við fræðilega innlögn, markvissa ástundun íþrótta eða líkams- og heilsurækt. Þjálfa þarf nemendur í því að taka ábyrgð á eigin heilsu. Bjóða skal nemendum fjölbreytta þjálfun sem nær til alhliða líkams- og heilsuræktar, almenningsíþrótta og íþróttagreina. Við kennslu íþróttagreina skal áfram leggja áherslu á leikræna nálgun undirstöðuatriða og tengja kennsluna við umræðu um gildi íþrótta.

Helstu viðfangsefni eru: Grunnþjálfun, ýmsir leikir og æfingar, þrautabrautir, glíma, hringþjálfun, blak, körfubolti, handbolti, knattspyrna og ýmsar æfingar og leikir með bolta, fimleikar, frjálsíþróttir, útivera, ýmis hlaup, löng og stutt, 12 mín. hlaup (Coopertest), stöðvaþjálfun, teygjur og slökun.

Námsgögn: Bækur og rit um íþróttir, líkamsrækt og leiki. Ýmsir boltar og ýmis áhöld stór og smá.

Námsmat: Nemendur fá einkunn eftir fyrstu önn sem byggist eingöngu á tveimur prófum annarsvegar 20 mínútna hlaupi og hinsvegar Coppertesti, þ.e. 12 mínútna hlaupi. Á önn tvö og þrjú byggist námsmatið á hlutlægu mati þ.e. ýmiss konar prófum og könnunum en líka á huglægu mati kennarans, þ.e. metinn er áhugi nemenda á námsefninu, virkni þeirra í tímum, hegðun og framkoma gagnvart bekkjarfélögum og kennara.

Íþróttafatnaður:

Í útileikfimi er áríðandi að nemendur komi í fötum sem þægilegt er að hreyfa sig í, best að vera í íþróttagalla. Þegar nemendur byrja inni í sal er eftirfarandi útbúnaður nauðsynlegur: Stuttbuxur, bolur, léttir íþróttaskór og handklæði. Æskilegt er að nemendur mæti með íþróttaskó í íþróttatíma!

Sund

Kennari: Ásta Sigrún Gylfadóttir

Markmið:

Á unglingastigi skal lögð áhersla á þátt upplifunar í allri sundkennslu. Slík nálgun hefur það að markmiði að koma í veg fyrir brottfall og slaka ástundun sem oft einkennir þetta tímabil. Sækjast skal eftir því að unglingarnir njóti þess að stunda sundnám og hafi af því bæði lærdóm og ánægju. Þá skal reynt að gefa nemendum tækifæri til aukinna valmöguleika sem stuðlað geta að sérhæfingu og betri færni hvers og eins. Jafnframt skal stefnt að því að bæta þau áfangamarkmið sem náðust við lok 7. bekkjar.

Leiðir:

Kennari stendur á bakka og stjórnar æfingum og leikjum. Nemendur framkvæma æfingar eftir fyrirmælum og fá leiðsögn miðað við getu hvers og eins.

Námsgögn:

Bækur og ljósrit í eigu kennara. Korkur og ýmis smááhöld.

Helstu viðfangsefni eru:

Nemandi bæti tækni í helstu sundaðferðum, s.s. bringu -, skrið- og baksundi.

Námsmat:

Próf:

Tímatökur:

Nemandi velur tvær aðferðir af fjórum:

100 m bringusund þar sem tímalágmark er fyrir drengi er 2 mín. og 15 sek. en stúlkur 2 mín. og 20 sek.
50 m skriðsund þar sem tímalágmark er fyrir drengi 55,0 sek. en stúlkur 58,0 sek.
50 m baksund þar sem tímalágmark er fyrir drengi 65,0 sek. en stúlkur 68,0 sek.
25 m flugsund þar sem tímalágmark er fyrir drengi 31,0 sek. en stúlkur: 33,0 sek.
600 m viðstöðulaust á innan við 20 mínútum bringu- og/eða skriðsund.
Kafsund 12 m.
Björgunarsund með jafningja 25 m.
Troða marvaða í a.m.k. 1 mínútu.

Námsmat: Byggist á frammistöðu í prófi.(70%) og kennaraeinkunn sem samanstendur af mætingu, virkni og hegðun í kennslustundum (30%).

Sundfatnaður: Áríðandi er að nemendur mæti í sundfötum sem gott er að synda og hreyfa sig í. Æskilegasti fatnaður er sundskýla fyrir stráka, ekki sundbuxur, og sundbolur fyrir stelpur, ekki bikiní. Annar útbúnaður er handklæði, hárbursti og ef þurfa þykir sundhetta og /eða sundgleraugu.