Námskrá

9. bekkur 2011-2012

Umsjónarkennarar eru:

9. N: Margrét Ísleifsdóttir. Heimastofa bekkjarins er nr. 121 á neðri hæð skólans.

9. S: Signý Helgadóttir. Heimastofa bekkjarins er nr. 123 á neðri hæð skólans.

Samkvæmt viðmiðunarstundaskrá Menntamálaráðuneytis er nemendum í 9. bekk ætlað að vera 37 kennslustundir á viku í skólanum.

Stundaskrár bekkjanna er að finna á mentor.is

ÍSLENSKA

Kennari: Signý Halla Helgadóttir

Markmið:

Byggt er á Aðalnámskrá grunnskóla sem í stuttu máli miðar að því að auka færni nemandans í íslensku almennt, þ.e. í töluðu máli, lestri, hlustun og ritun og efla með nemandanum skilning á sögulegu og menningarlegu gildi íslenskrar tungu og bókmennta.

Leiðir:

Unnið er í lotum og er námsefni vetrarins skipt niður í 9 þriggja vikna lotur sem hver hefur sínar áherslur og eina upprifjunarlotu.

Bókmenntir og ritun:

Lesin er Korkusaga, auk kjörbóka, smásagna og greina. Einnig er lesin Hrafnkelssaga Freysgoða, þjóðsögur, ævintýri og goðsögur. Verkefnavinna: ritunar æfingar, útdrættir og endursagnir úr lesnu og ólesnu efni. Unnið með ljóðahugtök, ljóð lesin og ort.

Bókmenntaritgerð og bókarkynningar eru unnar í tengslum við lestur skáldsagna.

Í ritun er lögð áhersla á að nemendur geti byggt upp sjálfstæða frásögn, sagt frá persónulegri reynslu og rökstutt skoðanir.

Nemendur eru þjálfaðir í framsögn með upplestri á sögum, ljóðum, upplestri ritgerða og öðru efni sem þeir semja sjálfir.

Foreldrar eru hvattir til að örva börn sín til lesturs góðra bóka. Lögð er áhersla á að nemendur skili verkefnum vel rituðum og frágengnum.

Málfræði og stafsetning: Í málfræði er unnið með grundvallaratriði og grunnur lagður að færni nemenda í beygingafræði orðflokka. Sérstök áhersla er lögð á beygingu fallorða og skilning á einkennum helstu orðflokka, orðflokkagreiningu. Reynt er að tengja málfræðireglur stafsetningunni og mikið unnið af málfræði- og stafsetningaræfingum. Málfarsverkefni eru í hverri lotu. Í stafsetningu er lögð áhersla á þjálfun grundvallaratriða með skriftarvinnu.

Námsefni:

Skerpa 2, 9 lotubundin vinnuhefti: Mályrkja II, lestrarbók. Skriffinnur, Hrafnkelssaga Freysgoða, Korkudaga, kjörbækur, Ljóðspeglar, Málfinnur og Hugfinnur.

Námsefni af vef. Upprifjunarhefti.

Mat:

Unnið er í lotum. Nemendur skila öllum verkefnum í lok lotu og taka próf. Einkunn hverrar lotu er meðaltal verkefna og vinnu í tímum ( 40%) og prófs (60%). Hver nemandi er með sína viðmiðunareinkunn sem hann ákveður í samráði við kennara í upphafi skólaárs og einsetur sér að ná henni á lotuprófi.

Metin eru verkefni, vinna og vinnubrögð, ástundun og þekking. Vægi í einkunn 50%. Prófað verður við lok vorannar. Vægi í einkunn 50%.

STÆRÐFRÆÐI

Kennarar: Margrét Ísleifsdóttir og Guðný Sigurjónsdóttir

Markmið:

Að nemendur:

Efli hæfni sína til að lesa og skrá stórar og smáar tölur og þekki ýmsar leiðir við talnaritun, svo sem veldishátt og staðalform og geti beitt helstu reiknireglum um veldi.
Nái nokkru valdi á að einfalda stæður með því að draga saman líka liði, þátta og margfalda inn í sviga og geti nýtt sér stæður og jöfnur til að leysa gátur og ýmis viðfangsefni úr daglegu lífi.
Æfist í að nota jöfnur til að leysa viðfangsefni. Geri greinarmun á stæðu og jöfnu.
Nái leikni í að einfalda og leysa jöfnur og þekki leiðir til að sýna samband stærða með jöfnum, töflum og gröfum (línuritum). Geti teiknað graf jöfnu og lýst staðsetningu með hnitum.
Öðlist skilning á helstu reiknireglum (víxlreglu, tengireglu og dreifireglu) og leikni til að reikna með jákvæðum og neikvæðum tölum. Nái góðu valdi á samsettum útreikningum og forgangsröð aðgerða.
Öðlist færni í að fást við hlutföll í ýmsu samhengi, t.d. einslögun, og geti notað hlutföll við samanburð á stærðum og í útreikningum. Geti rökstutt niðurstöður sínar og skýrt lausnarleiðir, t.d. þar sem hlutföll koma fyrir.
Þekki einkenni tvívíðra og þrívíðra forma. Læri að finna rúmmál og yfirborðsflatarmál ýmissa réttra strendinga. Þekki ýmsar gerðir marghyrninga og geti fundið flatarmál, ummál, hornasummu og hornastærðir þeirra. Geti reiknað ummál og flatarmál hrings og hugtök honum tengd s.s. þvermál, geisla, boga og hringgeira.
Auki færni sína í prósentureikningi þar sem finna þarf hluta, prósentu og heild og geti reiknað breytingar og mismun í hundraðshlutum með hjálp breytiþáttar.
Þekki vel mælieiningar tímatalsins. Nái góðu valdi á metrakerfinu og geti skráð sömu stærð í mismunandi mælieiningum. Geti skráð hraða með ólíkum viðmiðum og reiknað út hraða og átti sig á því að hraði er hlutfall vegalengdar og tíma.

Námsgögn:

Stærðfræði Átta-tíu bækur 3 og 4, höfundar Guðbjörg Pálsdóttir og Guðný Helga Gunnarsdóttir.
Almenn stærðfræði II og III. Eftir Björk, Björksten, Brolin, Ernestam og Ljungström.
Ýmis verkefni frá kennara.
Gagnvirk forrit frá Námsgagnastofnun, stærðfræðivefurinn rasmus.is o.fl.

Leiðir:

Einstaklingsvinna með áherslu á sjálfstæð vinnubrögð og gagnrýna hugsun. Hópvinna, þjálfun í að vinna með öðrum í krefjandi verkefnum. Tölvunotkun. Umhverfið notað í þeim námsþáttum sem við á.

Námsmat:

Símat sem byggist á kaflaprófum, stærri prófum inn á milli og vinnu nemenda. Meðaltal úr prófum 80%, vinna 20%.

DANSKA

Kennari: Ásdís Óskarsdóttir

Markmið:

Að nemendur:

Bæti færni sína í notkun allra þátta málsins svo sem hlustun, lestri, tali og ritun.
Geti greint megininntak talaðs máls.
Geti lesið og skilið mismunandi texta.
Geti tjáð sig á skiljanlegu máli um efni sem fjallað hefur verið um.
Geti haldið uppi einföldum samræðum.

Leiðir:

Nemendur hlusta, lesa og þýða, vinna í vinnubók og skrifa texta. Lögð er áhersla á að nemendur tjái sig á dönsku, meðal annars með samtalsæfingum sem unnar eru í hópum. Einnig eru notuð gagnvirk verkefni unnin í tölvu.

Gögn:

Tænk eftir Ásdísi Lovísu Grétarsdóttur og Ernu Jessen, Glimrende! textabók, vinnubók og geisladiskur eftir Arnbjörgu Eiðsdóttur og Kristínu Jóhannesdóttur. Hvad siger du? B hefti, hlustunarverkefni eftir Hlín H. Pálsdóttur og Svandísi Ólafsdóttur. Málfræðihefti þar sem farið er yfir öll helstu atriði. Tímaritið Vi unge, Anders And blöð og danskar bækur eftir því sem við verður komið.

Heimavinna:

Ætlast er til heimavinnu fyrir hvern tíma. Áætlunin er birt á Mentor.

Námsmat:

Próf í lok anna 60%, vinna í kennslustundum og kannanir 25%, heimanám 15%.

ENSKA

Kennari: Ásdís Óskarsdóttir

Markmið:

Að nemendur:

Geti skilið og talað um kunnugleg málefni.
Lesi ýmsa texta til að auka orðaforðann og máltilfinninguna.
Fái þjálfun í helstu þáttum málfræðinnar.
Fái innsýn í menningu og siði enskumælandi þjóða með margvíslegum verkefnum.
Þjálfist í helstu þáttum málfræðinnar, ritun og notkun hjálpargagna svo sem orðabóka.

Námsefni og leiðir:

Kennslugögn: New Matrix Pre-intermediate, lestrar- og vinnubók með geisladiski. Ýmis verkefni í málfræði og margvísleg verkefni og textar sem kennari útbýr. Einnig unnið með forrit í tölvum og efni af Netinu.

Námsmat:

Próf í lok anna 60%. Ýmis könnunarpróf og vinna í tímum 25%. Heimavinna 15%.

SAMFÉLAGSFRÆÐI

Kennari: Signý Halla Helgadóttir

Markmið:

Nemandi á að:

Hafa sett sig inn í tíðaranda og í spor fyrri tíðar fólks, einkum jafnaldra, með því m.a. að kanna frumheimildir.
Hafa þekkingu á nokkrum tæknibreytingum síðustu hundrað ára og m.a. áhrifum þeirra á tjáningu, boðskipti og listsköpun.
Sýna frumkvæði og skipulagshæfni við öflun upplýsinga eftir fjölbreyttum leiðum um valin málefni tímabilsins.
Greina málefni með gagnrýnum huga og koma þeim á framfæri með skapandi, skýrum og fjölbreyttum hætti.
Læra að þekkja og bera saman ólík svæði í heiminum út frá upplýsingum af kortum og geta rætt um hvaða þættir hafa áhrif á lífsskilyrði fólks og staðarval.
Fjalla um valin málefni sem rætt er um í fjölmiðlum.

Leiðir:

Nemendur vinna hópverkefni og einstaklingsverkefni sem þeir flytja í kennslustundum. Farið verður í vettvangsferðir. Lesefni af ýmsu tagi s.s. dagböð og kennslubækur sem henta inn í umfjöllun hverju sinni.

Námsefni:

Landafræði 2. hefti fyrir unglinga eftir Göran Andersson og fl.styrjaldir og kreppa. Stríðsárin á Íslandi 1939-1945 eftir Jenný Björk Olsen og Unni Hrefnu Jóhannsdóttur. Árið 1918 eftir Helga Grímsson. Auk efnis sem ofarlega er á baugi hverju sinni.

Mat:

Haust- vetrar- og vorönn: Heimavinna, ástundun og verkefnavinna 40% og próf 60%.

NÁTTÚRUFRÆÐI

Kennari: Sigurður Þorsteinsson

Eðlisvísindi

Markmið:

Að nemendur:

Þekki hvernig frumeindir eru gerðar úr rafeindum, róteindum og nifteindum og geti skilgreint hugtökin sætistala, massatala og samsæta.
Vinni með lotukerfið og skilji að frumefnin raðast eftir eiginleikum sínum og fjölda róteinda.
Þekki á hvaða forsendum lotukerfi Mendelejevs var byggt á sínum tíma og þekki til kenningar Niels Bohrs um frumeindir.
Geri sér grein fyrir, með notkun líkana og teikninga, hvernig frumeindir geta tengst saman og myndað sameindir sem ýmist eru frumefni eða efnasambönd.
Þjálfist í að finna mismunandi efnaformúlur: án þess að nota tölvuforrit - með tölvuforriti.
Þjálfist í að skrifa og stilla einfaldar efnajöfnur og kunni að staðfesta þær: án þess að nota tölvuforrit - með tölvuforriti.
Geti sýnt fram á að efnasambandið vatn klofnar í frumefni sín við rafgreiningu.
Geti framkvæmt athuganir til að komast að því hvort óþekkt efni er:
hreint efni - efnablanda - og ef efnið er hreint efni þá hvort það sé frumefni eða efnasamband.
Hafi kynnst eiginleikum mikilvægustu lofttegundanna, þekki efnasamsetningu lofthjúpsins og hugtökin ósonlag og gróðurhúsaáhrif: eðli - orsök - afleiðingu.
Geri sér grein fyrir skynjanlegum eiginleikum ljóss, svo sem speglun,ljósbroti og litrófi.
Þekki helstu gerðir rafsegulbylgna og áhrif þeirra á lífverur og hluti.
Geti útskýrt hljóð með vísun til bylgjueiginleika og með vísun til frumeindakenningarinnar.
Geti skýrt helstu hugtök tengd rafmagni og seglum svo sem rafspennu, rafstraum, viðnám rafhleðslu, raf‐ og segulsvið, raf‐ og segulkraft, raforku og rafal.
Þekki uppbyggingu nokkurra nútímarafmagnstækja.

Lífvísindi

Kynnist völdum þáttum úr sögu náttúruvísinda sem varpa ljósi á þróun lífvísinda.
Ræði um nokkrar ráðgátur sem lífvísindin glíma við í dag og möguleg samfélagsáhrif: á Íslandi - í alþjóðlegu samhengi.
Geti lýst sameiginlegum einkennum lífvera.
Geti lýst orkuþörf lífvera og hvernig þær verða sér úti um orku.
Geti skýrt hvers vegna vatn er nauðsynlegt öllum lífverum.
Geri greinarmun á ólífrænum og lífrænum efnum og þekki hlutverk sykurefna, prótína, fituefna og erfðaefnisins.
Þekki algengustu frumefnin í lífverum.
Geti skýrt frumuöndun og ljóstillífun: megineinkenni - hvernig þessi mikilvægu efnaferli tengjast.
Geti lýst sameiginlegum einkennum lífvera.
Geti lýst orkuþörf lífvera og hvernig þær verða sér úti um orku.
Geti skýrt hvers vegna vatn er nauðsynlegt öllum lífverum.
Þekki algengustu frumefnin í lífverum.
Geti skýrt frumuöndun og ljóstillífun: megineinkenni - hvernig þessi mikilvægu efnaferli tengjast.
Skilja að vistkerfi byggist á samspili lifvera innbyrðis og við lífvana umhverfi og geti skýrt mögulegar afleiðingar þess að fæðukeðjur raskist.
Geti lýst hringrás efna og orku í náttúrunni.

Námsefni:

Orka. Hálfdán Ómar Hálfdánarson þýddi og staðfærði.
Efnisheimurinn eftir Hafþór Guðjónsson.
Lifandi veröld. Hálfdán Ómar Hálfdánarson þýddi og staðfærði.

Námsleiðir:

Kennari fer yfir námsefnið, verkefni unnin sem einstaklingsverkefni og hópaverkefni, myndbönd skoðuð og tilraunir gerðar.

Námsmat:

Vinna í tíma,vinnubók, könnunarpróf og heimavinna gilda 40%. Lokapróf 60%.

LÍFSLEIKNI

Kennari: Signý Helgadóttir og Margrét Ísleifsdóttir

Markmið:

Nemendur:

Styrkist í að vernda persónuleg og tilfinningaleg mörk sín gegn óæskilegu áreiti og misbeitingu.
Læri að vega og meta hvort einhver samskipti og hegðun falli utan þess ramma sem lög og reglur setja.
Læri að íhuga á gagnrýninn hátt langanir sínar, væntingar og sérstöðu til að öðlast aukna sjálfsþekkingu.
Verði meðvitaðir um rétt sinn til að halda draumum sínum og skoðunum fyrir sig og rækta lífsgildi á eigin forsendum.
Skynji félagslegar aðstæður til að geta metið hvort og hvernig þeir gerist þátttakendur í þeim, t.d. að standast þrýsting til að gera eitthvað gegn betri vitund.
Öðlist færni í ópersónulegum samskiptum.
Skilji samspil samfélags, umhverfis, náttúru og menningar.
Þekki hættur samfara neyslu ávana- og fíkniefna.
Viti hverjir eru helstu áróðursmiðlar nútímans.
Geti greint frá hlutverki löggjafarvalds, dómsvalds og framkvæmdavalds.
Sé meðvitaður um gildi löggæslu til að halda uppi lögum og reglu.
Þekki helstu stofnanir sem þjóna landsmönnum.
Geti rætt um þætti sem kunna að stuðla að velferð þjóðarinnar og alls mannkyns.
Geti metið hvaða skyldur og ábyrgð þeir bera gagnvart samborgurum sínum og efli með sér borgaravitund.
Geti gert kostnaðarreikning um fastar greiðslur heimila.
Séu meðvitaðir um félagslega og siðferðilega ábyrgð sem neytendur.

Námsgögn:

Námsefnið er fengið úr ýmsum bókum, blöðum/tímaritum, af netinu, úr sjónvarpinu o.fl. (eftir því sem við á hverju sinni).

Leiðir:

Nemendur ræða saman og tjá sína skoðun á efninu. Einstaklingsvinna með áherslu á sjálfstæð vinnubrögð og gagnrýna hugsun. Hópavinna, þjálfun í að vinna með öðrum. Tölvunotkun.

Námsmat:

Námsmatið byggist á frammistöðu í kennslustundum og ástundun.

ÍÞRÓTTIR

Kennarar: Ásta Sigrún Gylfadóttir og Ragnar H. Róbertsson

Íþróttakennsla drengja fer fram í Kópavogsskóla fram að áramótum og í íþróttahúsi Breiðabliks í Smáranum eftir áramót. Íþróttakennsla stúlkna fer fram í íþróttahúsi Breiðabliks í Smáranum fram að áramótum en í Kópavogsskóla eftir áramót.

Á unglingastigi er nauðsynlegt að tengja íþróttakennsluna í auknum mæli við fræðilega innlögn, markvissa ástundun íþrótta eða líkams- og heilsurækt. Þjálfa þarf nemendur í því að taka ábyrgð á eigin heilsu. Bjóða skal nemendum fjölbreytta þjálfun sem nær til alhliða líkams- og heilsuræktar, almenningsíþrótta og íþróttagreina. Við kennslu íþróttagreina skal áfram leggja áherslu á leikræna nálgun undirstöðuatriða og tengja kennsluna við umræðu um gildi íþrótta.

Helstu viðfangsefni eru: Grunnþjálfun, ýmsir leikir og æfingar, þrautabrautir, glíma, hringþjálfun, blak, körfubolti, handbolti, knattspyrna og ýmsar æfingar og leikir með bolta, fimleikar, frjálsíþróttir, útivera, ýmis hlaup, löng og stutt, 12 mín. hlaup (Coopertest), stöðvaþjálfun, teygjur og slökun.

Námsgögn: Bækur og rit um íþróttir, líkamsrækt og leiki. Ýmsir boltar og ýmis áhöld stór og smá.

Námsmat:

Byggist á hlutlægu mati þ.e. ýmiss konar prófum og könnunum en líka á huglægu mati kennarans, þ.e. metinn er áhugi nemenda á námsefninu, virkni þeirra í tímum, hegðun og framkoma gagnvart bekkjarfélögum og kennara.

Íþróttafatnaður:

Í útileikfimi er áríðandi að nemendur komi í fötum sem þægilegt er að hreyfa sig í, best er að vera í íþróttagalla. Þegar nemendur byrja inni í sal er eftirfarandi útbúnaður nauðsynlegur: Stuttbuxur, bolur, léttir íþróttaskór og handklæði. Æskilegt er að nemendur mæti með íþróttaskó í íþróttatíma!

SUND

Kennari: Ragnar H. Róbertsson

Tímabil: 6. september - 25. mars.

Markmið:

Á unglingastigi skal lögð áhersla á þátt upplifunar í allri sundkennslu. Slík nálgun hefur það að markmiði að koma í veg fyrir brottfall og slaka ástundun sem oft einkennir þetta tímabil.

Sækjast skal eftir því að unglingarnir njóti þess að stunda sundnám og hafi af því bæði lærdóm og ánægju. Þá skal reynt að gefa nemendum tækifæri til aukinna valmöguleika sem stuðlað geta að sérhæfingu og betri færni hvers og eins. Jafnframt skal stefnt að því að bæta þau áfangamarkmið sem náðust við lok 7. bekkjar.

Leiðir:

Kennari stendur á bakka og stjórnar æfingum og leikjum. Nemendur framkvæma æfingar eftir fyrirmælum og fá leiðsögn eftir getu hvers og eins.

Námsgögn:

Bækur og ljósrit í eigu kennara. Korkur og ýmis smááhöld.

Helstu viðfangsefni eru:

Nemandi bæti tækni í helstu sundaðferðum s.s. bringu-, skrið- og baksundi.

Námsmat:

Próf:

Tímatökur:

100 m bringusund þar sem tímalágmark er fyrir drengi 2 mín. og 20 sek. og stúlkur 2 mín. 25 sek.
50 m skriðsund þar sem tímalágmark er fyrir drengi 60,0 sek. og stúlkur 62,0 sek.
25 m baksund þar sem tímalágmark er fyrir drengi 32,0 sek. og stúlkur 34,0 sek.
Þrísund 75 m baksund, 75 m bringusund og 75 m skriðsund.
Kafsund 8 m.

Án tímatöku:

500 m sund, viðstöðulaust með frjálsum aðferðum.
Fatasund eftir stungu af bakka og 50 m sund, þar af 6-8 m kafsund.
Troða marvaða, afklæðast á sundi og synda til baka sömu vegalengd.

Námsmat:

Byggist á frammistöðu í prófi.(50%) og kennaraeinkunn sem samanstendur af mætingu, virkni og hegðun í kennslustundum (50%).

Sundfatnaður:

Áríðandi er að nemendur mæti í sundfötum sem gott er að synda og hreyfa sig í. Æskilegasti fatnaður er sundskýla fyrir stráka, ekki sundbuxur, og sundbolur fyrir stelpur ekki bikiní. Annar útbúnaður er handklæði, hárbursti, og ef þurfa þykir, sundhetta og /eða sundgleraugu.