Fréttir

Nú eru komnar inn fleiri myndir frá þemadögum. Hér má sjá sýnishorn af þeim en þær eru af nemendum í 3. og 4. bekk, sem unnu saman þessa daga, og hluta af afrakstri vinnu þeirra. Hjá þeim var mikið föndrað og mikið fjör. Gerðir voru jólasveinar af ýmsum stærðum og gerðum ásamt öskjum og kortum. Öllum var síðan boðið á "kaffihús" sem sett var upp í einni stofunni og vakti það mikla gleði.

Jólatími var hjá 9. bekkingum í heimilisfræðivali í síðasta tíma fyrir jól. Á matseðlinum voru í aðalrétt fylltar kjúklingabringur með piparsósu, salati og kartöflubátum og í eftirrétt var heimalagaður (skólalagaður!) súkkulaðiís með heitri súkkulaðisósu. Góður grunnur fyrir komandi daga.

Einnig voru 8. bekkingar í góðu jólaskapi og hér má sjá myndir frá heimilisfræðitímum þeirra.

Þriðjudaginn 11. desember fóru nemendur 2. bekkjar í heimsókn á Gjábakka og áttu þar góða stund í leikfimi með eldri borgurum. Heimsóknin þótti takast vel og var öllum til gleði.

Fimmtudaginn 29. nóvember stóðu bekkjastjórnir 2. bekkjar fyrir piparkökuskreytingum hjá nemendum í 2. H og 2. L. Börnin skreyttu piparkökur, hlustuðu á jólalög og sungu nokkur vel valin jólalög fyrir foreldra og aðra gesti.

Mánudaginn 10. desember kom hingað í skólann Steinar Berg. Hann kynnti nýja bók sína sem nefnist Tryggðatröll og las upp úr henni fyrir nemendur í 2.- 5. bekk. Brian Pilkington myndskreytti bókina.

Í dag, fimmtudag, var þriðji og síðasti þemadagur. Verkefnin af svipuðu tagi og fyrri dagana en að sjálfsögðu fóru nemendur á milli verkefnahópa og því eitthvað nýtt fyrir þá á hverjum degi. Eldri borgarar komu í heimsókn og fræddu nemendur á miðstigi um jólahald fyrr á tímum. Fréttanefnd var starfandi og hér á eftir er afrakstur vinnu þeirra sem hana skipuðu. Á morgun eru kirkjuferðir, sbr. tilkynningu hér á síðunni.

Á öðrum degi þemaverkefna var starfið í svipuðum dúr og fyrsta daginn. Föndrað, bakað, skreytt, dansað, farið á bæjarrölt í Reykjavík og Hafnarfirði, slakað á í jólajóga og æft fyrir litlu jól. Nemendur á miðstigi fóru að sjá leikritið María, asninn og gjaldkerarnir í Borgarleikhúsinu.  Þar er fjallað um krakka í unglingadeild sem fengið er það verkefni að setja upp sjálfan helgileikinn. Ekki líst þeim of vel á þá hugmynd og ekki batnar það þegar nokkur börn úr barnadeildinni eru send til að taka þátt í uppfærslunni með þeim.

Þessa dagana er unnið að þemaverkefni hér í Kópavogsskóla.  Efnið er jólin og ýmislegt sem þeim tilheyrir svo sem föndur, bakstur, skreytingar, dans, leikhúsferð og fleira. Hér á síðunni má sjá afrakstur fréttahóps þriðjudagsins 4. desember en í hópnum voru Darri og Haukur úr 8. bekk Þ, Róbert og Snorri úr 9. A og Halla, Sunna, Sigrún og Sigríður M. úr 9. F.

Miðvikudaginn 21. nóvember fengu þeir sem eru í valfaginu “bíllinn” heimsókn. Það voru Benni Kalli og Reynir. Reynir kom frá VÍS en Benni Kalli hafði orðið fyrir hræðilegu slysi. Hann var á mótorhjóli í spyrnu á Akranesi á 200 km/klst. og lenti í holu. Hann kastaðist 65 metra fram fyrir hjólið. Hann hlaut 47 beinbrot og þar af 17 opin brot. Honum var vart hugað líf en hann náði góðum bata og kom og sagði okkur frá slysinu. Það þurfti að saga af honum fótinn vegna sýkingar í beininu.

Í dag kom slökkviliðið í heimsókn til 3. bekkja. Þau voru frædd um brunavarnir á heimilum og fengu að skoða slökkviliðs- og sjúkrabíla.

Af hálfu Alþingis hefur verið efnt til þeirrar nýbreytni að nemendum 8., 9. og 10. bekkjar er boðið upp á að taka þátt í Skólaþingi, kennsluveri Alþingis. Þar gefst nemendum kostur á að fara í hlutverkaleik með því að setja sig í spor þingmanna. Fjallað er um mál sem eru tilbúin fyrirfram. Reglum um starfshætti Alþingis er fylgt í stórum dráttum, mál lögð fram, haldnir þingfundir, nefndafundir og þingflokksfundir.

Miðvikudaginn 21. nóvember var Forvarnardagur í öllum grunnskólum landsins. Hann er haldinn að frumkvæði forseta Íslands í samvinnu við sveitarfélög og íþrótta- og æskulýðsfélög. Þar voru kynnt nokkur ráð sem geta forðað börnum og unglingum frá fíkniefnum. Foreldrar koma einnig að þessum degi og var fulltrúi þeirra hjá okkur Ívar Pálsson.

Fyrir nokkrum vikum var rýmingaræfing hér í Kópavogsskóla. Sú æfing var undirbúin og allir vissu að hún yrði á tilteknum tíma. Þá var ákveðið að halda aðra æfingu og þá án þess að nemendur og starfsfólk hefðu vitneskju um hana fyrirfram. Æfingin var í dag kl. 10:00 og gekk mjög vel.

Þriðjudaginn 20. nóvember voru undirritaðir hér í skólanum samningar um styrki til skólastarfs næstu 2 til 3 ár. Forsaga þess máls er sú að árið 2006 undirrituðu Foreldraráð Kópavogsskóla og skólastjóri sérstakan samning við Kópavogsbæ um aukið hlutverk foreldraráðsins. Í samningnum er ráðinu m.a. veitt heimild til  að leita til sérstakra bakhjarla í atvinnulífinu til styrktar þeim áherslum sem það kýs að leggja í skólastarfinu í góðri samvinnu við skólastjóra hverju sinni.

Þriðjudaginn 20. nóvember fórum við í 2-H og 2-L í heimsókn á lögreglustöðina þar sem Anna Lísa tók á móti okkur og sýndi okkur löggubílana og önnur tæki og tól sem löggurnar þurfa að nota í sinni vinnu. Að lokum fengu allir endurskinsmerki. Þetta var langur göngutúr og allir komu þreyttir en glaðir heim.

Föstudaginn 16. nóvember var dagskrá í Kjarnanum í tilefni af Degi íslenskrar tungu. Þann dag voru liðin 200 ár frá fæðingu Jónasar Hallgrímssonar, listaskáldsins góða, og því var dagurinn helgaður minningu hans. Stiklað var á stóru í lífsferli hans frá Hrauni í Öxnadal til Kaupmannahafnar. Nemendur úr 10. bekk lásu ljóð Jónasar og sýnd var stuttmynd gerð af nemendum í 10. bekk eftir sögu hans - Þegar drottningin á Englandi fór í orlof sitt. Að lokum voru sungin nokkur lög við texta Jónasar.

Mánudaginn 19. nóvember fengum við góða gesti í heimsókn, Fífilbrekkuhópinn, en hann skipa Hulda Björk Garðarsdóttir, sópransöngvari Eyjólfur Eyjólfsson, tenórsöngvari, Sigrún Eðvaldsdóttir, fiðluleikari, Sigurður Ingvi Snorrason, klarinettuleikari,  Anna Guðný Guðmundsdóttir, píanóleikari  og Hávarður Tryggvason, kontrabassaleikari. Þau fluttu texta Jónasar Hallgrímssonar við tónlist Atla Heimis Sveinssonar. Að þessu sinni nutu nemendur 7. - 10. bekkjar góðs af heimsókninni sem er á vegum verkefnisins Tónlist fyrir alla.

Ef illa liggur á okkur
og ekkert gaman hjá okkur
er huggunin og helsta von
að hafa upp á Bangsimon.

Hópur nemenda og foreldra í 9. bekk fór í ferð til Viðeyjar miðvikudaginn 24. október. Móttaka var í kirkjunni og hlýtt á sögu Viðeyjar. Síðan var grillað og fylgst með þegar kveikt var á friðarsúlunni. Allir komu ánægðir til lands um kl. 21.00. Frábær ferð í samstarfi bekkjastjórna og umsjónarkennara.

Viðeyjarferð 9. bekkja.

Undanfarið höfum við fengið skáld í heimsókn í skólann.  Gerður Kristný og Þórarinn Eldjárn komu í heimsókn á yngsta stig með Sögu- og ljóðafléttu.  Nokkrum dögum síðar komu Tveir ógeðslega frábærir....þeir Einar Már Guðmundsson og Einar Kárason í heimsókn til unglinganna. Að síðustu komu þær Kristín Steinsdóttir og Brynhildur Þórarinsdóttir og kynntu Víkinga, ambáttir, kempur og konunga á miðstigi. Bæði nemendur og kennarar skemmtu sér vel.

Skoða myndir á myndasíðu.

Mánudaginn 5. nóvember og þriðjudaginn 6. nóvember var 10. bekkingum boðið í sjóferð á skólaskipinu Dröfn. Nemendum var skipt í þrjá hópa og með hverjum hópi fóru tveir kennarar. Ferðin er skipulögð af Fiskifélagi Íslands og þarna fá nemendur að kynnast sjávarútveginum og vinnunni um borð í fiskiskipum.

Við gengum niður í fjöru í yndislegu veðri. Þar fundum við skeljar, kuðunga og ýmis fjörudýr sem við söfnuðum og skoðuðum.
Þegar við komum í skólann aftur var dótatími og þá spiluðum við og lékum okkur saman.  Skoða myndir

Í morgun kom Bergsteinn Jónsson, starfsmaður hjá UNICEF, og afhenti Kópavogsskóla viðurkenningu fyrir framlag nemenda í UNICEF-hreyfingunni sl. vor. Nemendur skólans söfnuðu 446.400 kr. sem fóru til aðstoðar börnum á átakasvæðum. Það var við hæfi að formaður nemendaráðs ásamt öðrum nemendaráðsfulltrúum skólans veitti viðurkenningunni móttöku, en viðurkenningin er í formi innrammaðs skjals.

Um þessar mundir eru Special Olympics 2007 leikarnir haldnir í Kína, en þeir voru settir í Shanghai 2. október. Gerpla á 4 fulltrúa á leikunum og einn þeirra er Jóhann Fannar Kristjánsson nemandi í 7. bekk í Kópavogsskóla. Hann hefur staðið sig með miklum sóma og unnið tvenn gullverðlaun í fimleikum, fyrir æfingar á hesti og fyrir gólfæfingar.

10. bekkir B og M fengu í lífsleiknitíma heimsókn frá AFS, sem eru sjálfboða-og skiptinemasamtök.  Markmið samtakanna er að auka kynni og skilning á milli ólíkra þjóða, með því að veita ungmennum á aldrinum 15-18 ára tækifæri til að dvelja í öðru landi.  Nemendur voru mjög áhugasamir og spurðu gestina margra spurninga.

3-K fékk heimsókn í dag. Einn nemandi bekkjarins er með gesti frá Bandaríkjunum og hún Juliette, 7 ára, kom í heimsókn.  Krakkarnir fengu að spreyta sig í ensku, en hana byrjuðu þau að læra í vetur. Juliette fór með þeim í smíði og íþróttir. Allir höfðu gagn og gaman af þessari heimsókn.

Föstudaginn 5. október var dótadagur hjá 2-H og 2-L.   Allir léku sér fallega með dótið og skemmtu sér vel.

Útivistardagur þann 18. september
Á útivistardaginn fóru 4. X og Y  göngu upp á Víghól. Þar fóru sumir í fótbolta en aðrir í yfir eða snúsnú. Allir skemmtu sér vel þrátt fyrir hellirigningu fyrri hluta ferðar.

Annar bekkur fór í gönguferð upp í kirkjuholt.  Allir voru í skemmtilegum leikjum innan um alla álfasteinana.

Dagana 6. og 7. september fór 10. bekkur í tveggja daga hjólaferð. Ferðin var skipu­lögð af bekkjarfulltrú­um og fóru 32 nem­endur ásamt 16 for­eldr­um með í ferðina auk Ragnars íþróttakennara, Bjarka hjóla­við­gerð­armanns, Kalla björg­unar­sveitar­manns og Kristínar Einars­dótt­ur sem fór með sem sérstakur fararstjóri. Kristín er frum­kvöð­ull slíkra ferða í Smára­skóla. Rúta ásamt bílstjóra fylgdi hópnum alla ferð­ina.

Enn er verið að vinna að breytingum á stjórnunarálmu Kópavogsskóla. Við erum því í sömu aðstöðu og þegar skólahald hófst í ágúst. Aðalnúmer skólans 570 4960 er virkt og skólastjóri, aðstoðarskólastjóri og ritari með aðsetur í stofu 101. Kennarar, og annað starfsfólk, eru með aðstöðu  á  skólasafni. Nemendur í 10. bekk M eru í stofu 102 en flytja í sína stofu, 221, að breytingum loknum.

Eins og fram kom hér á síðunni 25. maí tóku nemendur Kópavogsskóla, fyrstir nemenda á Íslandi, þátt í UNICEF-hreyfingunni.  Uppgjör er tilbúið frá UNICEF og samkvæmt því er heildarupphæð skilaðra áheita frá nemendum Kópavogsskóla rúmlega 446 þúsund krónur. 

Skólaslit Kópavogsskóla fóru fram föstudaginn 8. júní. Hjá yngsta stigi kl. 9:00, miðstigi kl. 10:00 og 8. og 9. bekk kl. 11:00. Lokaathöfn fór fram kl. 15:00 en þá var útskrift tíundu bekkinga og formleg skólaslit.

Mikið hefur verið um útiveru hjá þriðja bekk siðastliðna daga s.s. gönguferð upp á Víghól, leikið á leiksvæðum í nágrenni skólans  og gönguferð niður í Kópavogsfjöru. Skoða myndir 

1. júní fór 1. bekkur í vorferð í Húsdýragarðinn. Við byrjuðum á að skoða Grasagarðinn og fórum svo yfir í Húsdýragarðinn. Þar fengum við leiðsögn, starfsmaður sagði okkur frá dýrunum og högum þeirra. Síðan fengu allir grillaðar pylsur í stóra tjaldinu og að því loknu gengum við í Fjölskyldugarðinn þar sem allir fóru um borð í víkingaskipið. Allir skemmtu sér vel.  Skoða myndir

Í síðasta heimilisfræðitíma vetrarins í 9. bekk var haldin skemmtileg veisla. Í aðalrétt var eldaður Doritos kjúklingaréttur og í eftirrétt var lagaður ís og heit súkkulaðisósa. Umsjónarkennurunum Signýju og Helgu var boðið í mat og voru þær mjög ánægðar með matinn hjá krökkunum. Skoða myndir

Nemendur Kópavogsskóla hafa nú, fyrstir nemenda á Íslandi, lokið þátttöku sinni í UNICEF-hreyfingunni. Allt gekk frábærlega fyrir sig og gleðin skein úr hverju andliti eins og sjá má á myndunum sem fylgja fréttinni. Næsta verk krakkanna er að innheimta áheitin og koma þeim til Barnahjálpar Sameinuðu þjóðanna þar sem peningunum verður varið til að aðstoða börn í öðrum heimshlutum.

Nemendur í 2. bekk fóru í miðvikudagsgöngutúrinn sinn 23. maí.  Að þessu sinni var farið á leiksvæðið við Bræðratungu.  Þar er margt hægt að bralla eins og myndirnar bera með sér. Skoða myndir

Undanfarin ár hefur verið haldið fótboltamót fyrir nemendur á miðstigi og fór mótið í ár fram í Fífunni mánudaginn 14. maí.  Stelpnaliðin voru þrjú, eitt frá hverjum árgangi, og sigruðu stelpurnar úr 5.-RT. Strákarnir voru með þrjú lið í A-flokki og þrjú lið í B-flokki og fóru strákarnir úr 7.-UÞ með sigur af hólmi í báðum flokkum.

Fimmtudaginn 10. maí komu nemendur og kennarar í Skólahljómsveit Kópavogs og kynntu hljómsveitina fyrir nemendum í þriðja bekk.

1. bekkur fór niður að læk að veiða síli föstudaginn 27. apríl. Það veiddust tvö síli sem farið var með í skólann í fötu og þau vöktu mikla lukku. Í næstu viku ætlum við að rannsaka sílin betur.  Skoða myndir

Árshátíðir voru  haldnar í Kópavogsskóla fimmtudaginn 29. mars og föstudaginn 30. mars. Árshátíð unglingastigs var fimmtudaginn 29. mars  frá kl. 19:00 til miðnættis. Árshátíð yngsta stigs á föstudaginn 30. mars kl. 9:30 til 11:00 og árshátíð miðstigs sama dag kl.11:30 - 13:00.

Dagana 26. - 30. mars var 7. bekkur  í Skólabúðunum að Reykjum í Hrútafirði.  

Laugardaginn 24. mars fóru 10. bekkingar í Vatnaskóg á vegum foreldra. Lagt var af stað kl. 10:00  í rútu frá Inga, pabba Erlings, 21 nemandi og 4 foreldrar.
Fyrst var keyrt að Hvanneyri, kirkjan skoðuð og einnig Landbúnaðarsafnið,  traktorar af öllum stærðum og gerðum, ryðgaður þúfnabani sem þótti þvílík óprýði að smíða þurfti hús utanum hann, ullarselið þar sem hægt er að kaupa flest það sem framleitt er úr ull, ásamt tölum úr beinum og fleira.
Að lokum var keppt í sveitafitness. Það voru þrjár stelpur og þrír strákar sem kepptu í því.

Úrslit í árlegri stærðfræðikeppni grunnskólanna í Kópavogi voru kunngjörð fimmtudaginn 22. mars. Kópavogsskóli náði þeim frábæra árangri að eiga 4 af 9 vinningshöfum í 1.- 3. sæti.  Keppnin fór fram í Menntaskólanum í Kópavogi og kennarar þar annast fyrirlögn og yfirferð prófanna. Framkvæmdin er þeim til sóma í alla staði og framtakið er lyftistöng fyrir stærðfræðinám og kennslu.

Undanfarið hefur staðið yfir lestrarátak í yngri deild. Margar bækur hafa verið lesnar og áhugi mikill. Að lestrarátakinu loknu verða afhentar viðurkenningar.

Undanfarnar vikur hefur 3. bekkur unnið með reikistjörnur. Verkefnið er unnið í samvinnu við skólasafnið.

Félagar úr Samtökunum 78,  félagi  homma og lesbía á Íslandi, komu í heimsókn til 9. og 10. bekkinga 14. og 15. mars. Þau  kynntu samtökin og sátu fyrir svörum.                       

Í tilefni nýafstaðinna þemadaga  um vináttu, virðingu og vellíðan, komu allir nemendur og starfsfólk skólans saman á sal föstudaginn 9. mars.

Þemadagar voru í Kópavogsskóla 28. febrúar – 2. mars undir yfirskriftinni Vinátta - Virðing - Vellíðan. Mikil fjölbreytni í verkefnavali einkenndi þemadagana og óhætt að segja að eitthvað hafi verið í boði fyrir alla. Greinin sem hér fylgir er að mestu leyti unnin af fréttahópi daganna.

Vefur þessi er nýr vefur Kópavogsskóla en hann er ekki fullfrágenginn. Margt er þó komið inn og ýmsu verður bætt við á næstu dögum. Á meðan verður ,,gamla" heimasíðan virk og hægt er að smella á krækjuna til að komast á hana.