Fréttir

Jólaskemmtanir nemenda fóru fram 18. og 19. desember. Að kvöldi 18. desember var skemmtun unglingadeilda. Þar voru margs konar skemmtiatriði sem nemendur höfðu undirbúið. Má þar nefna tvísöng, hljóðfæraleik, frumlega uppsett leikrit og stuttmyndir. Gengið var í kringum jólatré og endað með dansi.  Jólaskemmtun yngsta stigs var föstudaginn 19. desember kl. 9:00. Þar spiluðu félagar úr Skólahljómsveit Kópavogs, nemendur 4. bekkjar fluttu helgileik og síðan var gengið í kringum jólatréð. Miðstig var með sína skemmtun kl. 11:00 sama dag. Þar var einnig hljóðfæraleikur Skólahljómsveitar og helgileikur í flutningi 7. bekkjar. Sá hópur gekk einnig í kringum jólatréð og söng af hjartans lyst.

Sjá myndir á myndasíðu.

Í síðasta tímanum fyrir jól voru miklar kræsingar á borðum hjá valhópum 9. bekkjar í heimilisfræði, Doritos kjúklingur og heimalagaður ís með súkkulaðisósu. Allir voru ánægðir með hvernig til tókst og nutu þess að borða.

Bekkjamóti Kópavogsskóla í skák er nýlokið. Sex bekkir tóku þátt í keppninni en keppt var á fjórum borðum. Í eldri flokki ( 8. – 10. bekkur ) vann sveit 8. bekkjar með 5 vinninga, í öðru sæti varð sveit 10. bekkjar með 4 ½ vinning og í þriðja sæti sveit 9. bekkjar með 2½ vinning. Í yngri flokki ( 5. – 7. bekkur) vann sveit 6. bekkjar með 6½ vinning, í öðru sæti varð sveit 5. bekkjar með 4½ vinning og í þriðja sæti sveit 7. bekkjar með 1 vinning. Í morgun voru afhentar viðurkenningar fyrir árangurinn. Sjá myndir.

Nánari upplýsingar er að finna i fréttabréfi skólans.

Nemendur Kópavogsskóla fengu óvenjumargar heimsóknir í dag og allar ánægjulegar. Árni Sigurðsson veðurfræðingur ræddi við nemendur í 6. og 9. bekk um veðrið en umfjöllun sína kallaði hann ,,Er veðrið að breytast?“ Það var fróðlegt og um margt að spyrja enda veðrið sígilt umræðuefni.

Berglind Hilmarsdóttir bóndi heimsótti nemendur 7. bekkjar og var með þeim allan morguninn.

Fimmtudaginn 20. nóvember og föstudaginn 21. nóvember var 10. bekkingum boðið í sjóferð á skólaskipinu Dröfn. Nemendum var skipt í þrjá hópa og með hverjum hópi fóru tveir kennarar. Ferðin er skipulögð af Fiskifélagi Íslands og fengu nemendur að kynnast sjávarútveginum og vinnunni um borð í fiskiskipum. Líffræðingur frá Hafrannsóknastofnun var með í för og fræddi nemendur um starfsemi stofnunarinnar, landhelgina, hafstrauma, breytingar á veðráttu og áhrif þeirra breytinga á lífríki sjávar.  Smellið á meðfylgjandi mynd til að sjá myndir úr ferðunum.

Áfram héldum við með verkefni þemadaga. Fréttahaukar dagsins voru úr 9. bekk. Þeir tóku myndir af öllum hópum og viðtöl við allmarga, bæði nemendur og starfsmenn.

Hér má sjá afrakstur dagsins í þeirra starfi:

Þemadagar: Föstudagur 21. nóvember (pdf, 1.63)  Með því að smella á meðfylgjandi mynd sjást myndir dagsins.

Haldið var áfram með þemadaga í dag, fimmtudag, og verkefnin voru að mestu leyti þau sömu og í gær þannig að sem flestir fái að kynnast því fjölbreytta úrvali sem í boði er. Í fréttahópi dagsins voru nemendur úr 8. bekk og hér má sjá skrif þeirra:   

Þemadagar: Fimmtudagur 20. nóvember (pdf)

Fréttahópurinn sér einnig um myndatökur og úrvinnslu mynda að mestu leyti. Smellið á myndina sem fylgir þessum pistli til þess að sjá fleiri myndir.

Í síðustu viku heimsóttu nemendur í  10. bekk Gljúfrastein, heimili Halldórs Laxness í tengslum við íslenska bókmenntakennslu.

Skoða myndir

9. bekkir fóru í heimsókn á  Gerðarsafn í nóvember og sáu sýninguna frá Ekvador. Nemendur fengu leiðsögn um sýninguna og skoðuðu ýmsa markverða hluti frá fyrri tímum.

Þemadagar eru í Kópavogsskóla miðvikudag 19. nóvember, fimmtudag 20. nóvember og föstudag 21. nóvember. Aðalþemað er nýting/endurnýting og hagsýni. Einnig er boðið upp á hreyfingu og tónlist.  Fréttir og myndir munu birtast daglega og hér má sjá afrakstur fréttahóps miðvikudagsins:

Þemadagar: Miðvikudagur 19. nóvember (pdf)

Smellið á myndina til að sjá fleiri myndir.

Fimmtudaginn 6. nóvember  komu nemendur 1.  M og gistu eina nótt í skólastofunni  sinni. Föstudaginn 7. nóvember  komu svo nemendur úr 1. B og gistu í sinni stofu. Foreldrar mættu með börnunum og hjálpuðu þeim að koma sér fyrir. Eftir það fóru allir upp í skólaeldhús og fengu sér pylsur saman, síðan var farið í sal í leiki o.fl. Eftir að foreldrar voru farnir voru sagðar sögur fyrir svefninn. Allir sváfu vel um nóttina og vöknuðu hressir og  ánægðir. Þetta var gert til að auka  jákvæði  til skólans, samheldni og félagatengsl meðal nemenda.

4. bekkur hefur verið að vinna verkefni um helstu trúarbrögð heimsins það er Búddatrú, hindúatrú, íslam, gyðingdóm og kristni.  Þeirri vinnu lauk með kynningu fyrir foreldra. Fimmtudaginn 6. nóvember hófst skóladagur 4-KV á því að foreldrar þeirra mættu með þeim í skólann klukkan 8. Þar fengu foreldrar ýmislegt að vita um þessi trúarbrögð. Það var frábær mæting og nemendur stóðu sig vel í kynningum sínum.

Fimmtudaginn 23. október var haldið furðufataball hjá 1. B og M. Nemendur sungu og dönsuðu fyrir foreldrana og kynntu brúðurnar sínar sem þeir höfðu nýlokið við. Foreldrar buðu upp á poppkorn og djús og stjórnuðu börnunum í ýmsum leikjum.

Skólahlaup UMSK fyrir 4. – 10. bekk fór fram á Kópavogsvelli föstudaginn 17. október.  Það voru 14 hressir krakkar úr Kópavogsskóla sem mættu í hlaupið.  Allir þátttakendur fengu verðlaunapening og hressingu eftir hlaupið.  Tveir nemendur skólans náðu þeim góða árangri að sigra í sínum aldursflokki en þeir eru Sindri Magnússon 6.- N og Ingi Rúnar Kristinsson 10. – A. Við erum stolt af þeim og óskum þeim til hamingju.

Miðvikudaginn 15. október var höfuðfata-/höfuðskrautsdagur í Kópavogsskóla. Nemendur og kennarar mættu með hatta og höfuðskraut af ýmsu tagi og margir ansi frumlegir. Þetta er ágætis uppbrot á venjubundnum dögum og þarf oft ekki mikið til. Myndir tala sínu máli.

Undanfarnar vikur hafa fyrstubekkingar farið í göngu að heimilum sínum ásamt kennurum.  Þar sem heimilin voru töluvert dreifð um skólahverfið varð að fara nokkrar ferðir. Tækifærið var notað til að safna laufum, skoða haustlitina og leika sér í Hlíðargarði.

Landsmót Samfés, Samtaka félagsmiðstöðva á Íslandi, var haldið í Garði á Suðurnesjum dagana 3. - 5. október. Þar komu saman 311 fulltrúar nemendaráða víðs vegar að af landinu. Margs konar smiðjur voru í boði svo sem listvinna af ýmsu tagi, íþróttir, heimilisiðnaður, útivist og gönguferðir, umræður og fundarseta og skipulagning svo eitthvað sé nefnt. Tveir nemendur úr Kópavogi hlutu kosningu í ungmennaráð Samfés, Sindri Benediktsson úr Kjarnanum í Kópavogsskóla og Andri Steinn Hilmarsson úr Jemen í Lindaskóla. Við árnum þessum ágætu fulltrúum úr Kópavogi velfarnaðar í störfum.

Í síðustu viku, dagana 29. september til 1. október fóru nemendur 6. bekkja í hjólaferð út í Gróttu í fararstjórn Kristínar Einarsdóttur. Hjólaleiðin sem var farin í Gróttu er 14 km og veðrið lék við okkur alla dagana. Nemendur skemmtu sér hið besta og voru skólanum til sóma í hvívetna.

Fimmtudaginn 25. september fóru 3-H og 3-L í sinn vikulega göngutúr. Gengið var niður í Hlíðargarð þar sem allir hjálpuðust að við að tína laufblöð sem voru sett í pressun þegar heim var komið til að nota í margskonar verkefni í vetur. Áður en farið var heim léku sér allir saman í leiktækjunum og klifruðu í trjánum.

Miðvikudaginn 24. og fimmtudaginn 25. september fóru 10. bekkingar Kópavogsskóla á Skólaþing. Þegar komið var á staðinn fékk hver sína persónu sem alþingismaður og hópnum var skipt í fjóra flokka. Síðan voru haldnir þingflokksfundir og þar var skipað í nefndir, umhverfisnefnd, menntamálanefnd og allsherjanefnd. Þrjú  frumvörp voru kynnt og hver flokkur fékk sín stefnumál.

2. bekkur fór í sína vikulegu gönguferð í roki og rigningu. Komið var við á leikvelli þar sem nemendur æfðu kraftana í höndunum. Allir komu ánægðir til baka þó svo að margir yrðu rennblautir.

Á heimasíðu Námsgagnastofnunar nams.is er hægt að nálgast hljóðbækur á mp3 formi sem hlaða má niður á tölvu eða I-pod.   

Hljóðbækur

Stjórn Foreldrafélags Kópavogsskóla birtist óvænt í heimsókn í gærmorgun. Stjórnin kom ekki tómhent því starfsfólki skólans var færð stærðar terta. Stjórnin vildi með þessu lýsa yfir ánægju sinni með gott samstarf og óskum um gott gengi í vetur. Starfsfólk skólans færir þeim kærar þakkir fyrir framtakið.

Alla fimmtudagsmorgna fara 3.H og 3. L saman í útivist og var annar göngutúrinn farinn 4. september. Þá gengu bekkirnir saman upp að sundlaug Kópavogs og léku sér saman á Rútstúni áður en haldið var aftur í skólann.

Á síðasta skólaári var boðið upp á leiklistarkennslu á miðstigi og sem valgrein í 9. og 10. bekkjum. Þar sem þetta tókst mjög vel er nú boðið upp á leiklist aftur.

Leiklistarkennslan er nú að hefjast og eins og áður munu þau Margrét Kaaber og Eggert Kaaber sjá um kennsluna.

Við upphaf nýs skólaárs bjóðum við alla velkomna til starfa. Skólastarfið hefur farið vel af stað og við vonum að allt gangi vel í vetur. Við bendum ykkur á að fylgjast með fréttum og tilkynningum hér á heimasíðunni. Skóladagatal og starfsáætlun er hægt að skoða hér og reynt er að hafa á viðburðadagatalinu allt það sem helst er á döfinni. Við minnum líka á Mentor og allar upplýsingar sem þar eru. Mikilvægt er að láta vita ef netfang breytist. Ef ykkur finnst eitthvað mega betur fara í miðlun upplýsinga þá vinsamlegast hafið samband við stjórnendur eða ritara.

Skólaárin 2006-2007 og 2007-2008 hefur núverandi 8. bekkur Kópavogsskóla  verið í Nord-plus samstarfi við 7. bekk í Holmeskolen í Tønder á Suður Jótlandi. Tilgangur samstarfsins var að bera saman orkulindir hvors lands fyrir sig. Einnig fyrir íslensku nemendurna að auka dönskukunnáttu og  þá dönsku að fá innsýn í íslensku sögurnar, svo sem Gunnlaugssögu.

Í maí og júní skiptust bekkirnir á heimsóknum. Eftir mikil samskipti og undirbúning, þar sem aðstoð foreldra var ómissandi og ómetanleg, komu Danirnir, 19.-24. maí, og Íslendingarnir endurguldu svo heimsóknina 2.-6.júní.

Nemendur í 9. bekk hafa samið skemmtilegar barnasögur og myndskreytt. Þetta hefur tekist vel og margar fallegar og eigulegar bækur hafa orðið til.  Nokkrir nemendur úr 9-A lásu barnasögurnar sínar fyrir krakkana í 2. bekk og vakti það mikla lukku.

Eftir heimsókn 9. bekkjar vildu nemendur 2. bekkjar   endurgjalda greiðann. Hver nemandi samdi sína eigin sögu, útbjó bók og myndskreytti. Svo var farið í heimsókn í tíma hjá 9. bekk og sagan lesin fyrir þau.

Farið var í Búrfellsgjá. Gengið frá Vífilsstaðamisgengi í Heiðmörk inn eftir Búrfellsgjá að Búrfelli. Gengið kringum gíginn og ofan í hann.  Klifrað í klettum, skriðið um hella, gjár og gjótur rannsakaðar.  Allir höfðu gaman af og stóðu sig frábærlega.

Mánudaginn 2. júní fór 2. bekkur í vorferð. Farið var með rútu á bóndabæinn Grjóteyri við Meðalfellsvatn í Hvalfirði. Fyrst fórum við að skoða dýrin. Þarna voru hestar og folöld, hundar og hvolpar, geitur og kiðlingar, köttur og kettlingar, ær og lömb, kýr og kálfar og svo litlir hænuungar. Við fengum að halda á minni dýrunum, gefa þeim að borða og leika við þau. Síðan settumst við inn í fallegan garðskála og borðuðum nestið okkar. Að lokum fengum við að hlaupa um og leika okkur í leiktækjum og gömlum traktorum og sum okkar spiluðu fótbolta við hundana.

5. bekkingar fóru í gróðursetningar-og vorferð þriðjudaginn 3. júní í yndislegu veðri. Ferðin heppnaðist eins og best verður á kosið og allir virtust skemmta sér vel. Í Guðmundarlundi var þröng á þingi og margir bekkir frá mismunandi skólum þar samankomnir.

Þriðjudaginn 4. júní fór 6. RT í vorferð austur í Hveragerði. Þar var farið á hverasvæðið sem er inn í miðjum Hveragerðisbæ. Einnig fengu nemendur að upplifa jarðskjálfta í jarðskjálftahermi sem staðsettur er í upplýsingamiðstöð bæjarins. Ferðin heppnaðist vel enda var veðrið einstaklega gott.

Þann 29. maí fór 4.-X og Y í bæjarferð með strætó miður í miðbæ Reykjavíkur. Ferðinni var heitið að skoða Landnámssýninguna í Aðalstræti. Í leiðinni var farin gönguferð í kringum Tjörnina. Gömul hús skoðuð og nesti borðað.

Leiklistarval 9. og 10. bekkinga undir stjórn Eggerts Kaabers leikstjóra  setti upp stytta útgáfu af söngleiknum Grease á árshátíð nemenda fyrr í vetur.

Á vorönn fengu 7. bekkingar leiklistarkennslu hjá Margréti Kaaber, leikkonu og leikstjóra.

Föstudaginn 9. maí var 2. bekk boðið í 15 ára afmæli Gjábakka. Afmælið byrjaði kl. 14:00 með því að 2. bekkur söng við undirleik Skarphéðins tónmenntakennara síðan voru fluttar ræður, ljóð og meiri söngur. Að því loknu var boðið upp á stóra flotta tertu og mikið af sælgæti. Allir skemmtu sér vel saman eins og alltaf á Gjábakka.

Í dag þriðjudag var "Tónlist fyrir alla" fyrir yngsta stigið í Salnum í Kópavogi. Sýningin nefndist Smaragðsdýpið mikla.

Mánudaginn 26. maí fór 3. bekkur út í Viðey. Siglingin með ferjunni tekur um það bil 5 mínútur og þótti mörgum býsna skemmtilegt að sigla. Tekið var á móti okkur og við fengum að heyra ýmsar skemmtilegar sögur um sögu eyjunnar og hið mikla fuglalíf sem þar er. Við sáum Viðeyjarstofu og kirkjuna, friðarsúluna og akkerið, sem er minnismerki þeirra sem fórust með Kútter Ingvari í aftakaveðri snemma á síðustu öld.

Knattspyrnumót var haldið í Fífunni 20. maí. Þátttakendur í Kópavogsskóla voru 8. 9. og 10. bekkur og danskir nemendur sem voru hér í heimsókn hjá 8.bekk.

Skákstarfi í Kópavogsskóla lauk með hraðskákmóti 21. maí. Keppendur voru 14. Sigurvegari og hraðskákmeistari í 4.-7. bekk varð Bergþór Pálsson 7. bekk.

Á föstudag 16. maí tóku nemendur í skólanum þátt í söfnun fyrir Unicef. Nemendur í 1.-4. bekk fóru í alls konar þrautir á skólalóðinni og í íþróttahúsi. Og nemendur í 5.-10. bekk hlupu, spiluðu hafnabolta og fóru í þrautir niðri í dal, í Hlíðagarði og á túninu við Kópavogshæli.

Úrslit í stærðfræðikeppni grunnskólanna í Kópavogi voru kunngerð í hófi í Menntaskólanum í Kópavogi miðvikudaginn 14. maí.  Nemendur okkar stóðu sig frábærlega en úrslit urðu þessi:

Hin árlega vorferð var farin strax að samræmdum prófum loknum. Staldrað var við í Hrútafirðinum og menn fengu að snæða. Ferðinni var heitið í Varmahlíð í Skagafirði.

Skákmótið var haldið í apríl. Keppendur voru 14. Skákmeistari skólans í 4.-7. bekk var Jóhann Ragnarsson 7. bekk með 12 vinninga. Annar varð Bergþór Pálsson einnig úr 7. bekk með 11 vinninga og þriðji Ágúst Pálmason í 4. bekk með 10 og 1/2 vinning.

Í dag fengum við heimsókn frá Stoppleikhópnum með sýningu um ævi Bólu-Hjálmars. Sýningin var alveg frábær og náðu leikararnir svo sannarlega að halda athygli nemenda.

Þriðjudaginn 22. apríl fór 2. bekkur í heimsókn á Alþingi. Farið var með rútu niður í miðbæ Reykjavíkur og komu nokkrir vina okkar af Gjábakka með til að aðstoða. Fyrst var farið á Austurvöll og skoðuð styttan af Jóni Sigurðssyni. Síðan fórum við í Alþingishúsið þar sem Hildur Gróa tók vel á móti okkur. Hún sýndi okkur húsið, sagði okkur frá starfsemi og sögu Alþingis og bauð okkur svo upp á ostaslaufur, kleinur og mjólk á kaffistofu þingmanna.

Undanfarið hefur 3. bekkur verið að vinna á skólasafninu með reikistjörnurnar.  Þau hafa skoðað heimildir, unnið texta, teiknað myndir, litað hnetti og gert stóra vinnubók.  Afraksturinn sést þegar smellt er á myndina hér til hliðar.

Mánudaginn 21. apríl fór 2. bekkur í  heimsókn til vina sinna í Gjábakka.  Þau lærðu að spila boccía hjá Garðari, allir skemmtu sér vel og sýndu mikinn áhuga.  Áður en farið var heim var spjallað við við fólkið sem þar var og saumaskapur þeirra og postulínsmálun voru skoðuð.

Síðustu tvær vikur hafa verið farnar fjórar skoðunarferðir, á vegum Landsvirkjunar og Kópavogsskóla, austur að Sogi og Þingvöllum. Ingvar P. Guðbjörnsson kynningarfulltrúi Landsvirkjunar var fararstjóri. Í ferðirnar fóru 5. – 8. bekkur. Ekið var sem leið lá frá Kópavogsskóla austur yfir Mosfellsheiði og Grafning. Fyrsti áfangastaður var Írafossvirkjun. Hópurinn fór um virkjunina og fékk útskýringar á því hvernig rafmagnsframleiðslan fer fram.

Fimmtudaginn 17. apríl komu hingað börn úr leikskólunum ásamt leikskólakennurum.  Þetta eru nemendur sem byrja í Kópavogsskóla í haust. Skólinn var skoðaður, sögustund var á skólasafni og að lokum fengu gestirnir hressingu. Þetta er áhugasamur og skemmtilegur hópur.

Frétt frá Gylfa og Önnu Elísabetu, lögreglumönnum á svæðisstöðinni í Kópavogi.

Í tilefni af átaki gegn hraðaakstri í Kópavogi hefur lögreglan á höfuðborgasvæðinu verið með hraðamælingar í Kópavogi síðustu daga.      Mælt hefur verið með myndavélabúnaði sem er staðsettur í ómerktri lögreglubifreið.   Í skólahverfi Kópavogsskóla var t.d. fylgst með umferð um Digranesveg þann 11. apríl  þar sem 30 km hámarkshraði er.   Á þeim tíma sem myndavélin var á vettvangi óku 183 ökutæki um götuna, þar af voru 94 yfir leyfilegum hraða, sem er 51% af mældum ökutækjum. Er þetta hátt brotahlutfall að mati lögreglu. Meðalhraði þeirra sem ljósmyndaðir voru var hins vegar í lægri kantinum, eða 43,72 km. Fimm ökutækjum var ekið á 50 km hraða eða meira. Sá sem hraðast ók var á 57 km hraða.  Mælingin fór fram á skólatíma, milli kl. 10:45 og 11:45.

Þriðjudaginn 8. apríl héldu nemendur í 4. bekk X og Y bekkjarkvöld í skólanum. Þema kvöldsins var fjölþjóðlegt svo nemendur og foreldrar komu með mjög fjölbreytilegan mat á hlaðborðið. Nemendur kynntu verkefni sem þeir hafa unnið í tengslum við nám sitt í  Komdu og skoðaðu sögu mannkyns. Foreldrar og kennarar nemenda voru bæði hreyknir og ánægðir með flutning þeirra og vinnubrögð.

Á fimmtudag 10. apríl var haldið fótaboltamót í Fífunni fyrir 5.-7. bekk. Sigurvegarar í drengjaflokki voru drengir í 7. bekk. Í stúlknaflokki sigruðu stúlkur úr 6. bekk og í blönduðum flokki sigraði 7. bekkur.

Bekkjarskemmtun 3-KV var haldin 3. apríl. Það var vel mætt á skemmtunina og sáu nemendur um skemmtiatriði sem vöktu mikla lukku. Einn nemandi spilaði á klarinett, þrír sungu vorlög og leikinn var brandari. Einnig var haldin spennandi spurningakeppni þar sem foreldrar tóku þátt. Á eftir gæddu allir sér á góðgæti af sameiginlegu hlaðborði.

Þriðjudaginn 1. apríl fórum við í 2-H og L í gönguferð á Rútstún. Það var gaman að leika í öllum leiktækjunum og við vorum öll hress og kát eftir þennan göngutúr.

Miðvikudaginn 2. apríl fengu 10. bekkingar heimsókn frá Ráðgjafarstofu um fjármál heimilanna.  Ásta Sigrún Helgadóttir forstöðumaður kom og fræddi nemendur um fjármál. Nemendur voru mjög áhugasamir, kurteisir og duglegir að spyrja  um skatta, launamál og sparnað.

Dagana 10.-14. mars sl. dvöldu nemendur í 7.JP í skólabúðunum að Reykjum í Hrútafirði. Þar hittu þau fyrir nemendur úr Vatnsendaskóla og Hamraskóla í Grafarvogi. Þar var gott að vera og stíf dagskrá keyrð bæði innan húss og utan dyra. Krakkarnir skemmtu sér hið besta og voru skólanum sínum til sóma.

Smelltu á myndina til að skoða fleiri myndir.

Árshátíðir nemenda Kópavogsskóla voru haldnar 13. og 14. mars. Nemendur unglingadeilda héldu sína árshátíð að kvöldi fimmtudags 13. mars frá kl. 19:00 til miðnættis.  Að loknu borðhaldi tóku við ýmis skemmtiatriði en aðalatriði kvöldsins var sýning hóps nemenda á söngleiknum Grease.

Það líður að páskum og um leið og við rannsökum brum trjánna notum við í 4. - X tækifærið og skreytum fyrir páskana með páskaungum og eggjum.

Fimmtudaginn 6. mars var bekkjarkvöld hjá 2. bekk þar sem eldri borgurum á Gjábakka var boðið. Nemendur fóru með frumsamin ljóð, sungu og dönsuðu, í lokin buðu nemendur eldri borgurum og foreldrum upp í vals og línudans. Að því loknu var boðið upp á veitingar í boði foreldra og skóla.  Allir skemmtu sér vel saman.

Stóra upplestrarkeppnin í 7. bekk  fór fram innan skólans í morgun fimmtudaginn 6. mars.

Börnin í 2. bekk hafa verið að vinna með póstkort og frímerki í stærðfræði.  Í tengslum við þá vinnu skrifuðu börnin bréf og settu í póst.

Föstudaginn 29. febrúar tók 2. bekkur þátt í Góugleði á Gjábakka.  Þau sungu nokkur lög og síðan var þeim boðið upp á veitingar.

Í morgun föstudaginn 29. febrúar var "Tónlist fyrir alla" á yngsta og miðstigi.  

Á þessu skólaári hefur Eiríkur Karlsson leiðbeint nemendum í skák. Þann 20. og þann 26. febrúar var sveitakeppni í skák. Annars vegar hjá 8.-10. bekk og hins vegar hjá 4.- 7. bekk.

Leiktæki unglinganna hafa látið á sjá með tímanum og nú er búið að endurnýja þau. Nýtt billiardborð er komið í anddyri skólans ásamt nýju þythokkýborði og fótboltaspili og ekki annað að sjá en að krökkunum líki það vel.

Skólaliðar og stuðningsfulltrúar frá Vallaskóla á Selfossi komu í heimsókn í Kópavogsskóla í vikunni. Markmið þeirra var að kynna sér störf kollega sinna í öðrum skólum og skoða aðstæður sem eru líkar um margt en einnig ólíkar.

Í dag miðvikudaginn 20. febrúar kom Ilmur Kristjánsdóttir leikkona hingað í skólann og las upp úr bókinni Sölku Völku eftir Halldór Kiljan Laxness fyrir 5.- 7. bekk. Heimsóknin var í tengslum við leiklistarnámskeið sem stendur nú yfir.

Nemendur í 2-H búa til grænmetiskarla í heimilisfræði. 

Skoða myndir

Þriðjudaginn 15. janúar notuðum við í 2. bekk tækifærið og fórum í brekkuna á milli Bræðratungu og Vogatungu og renndum okkur í snjónum. Allir voru rjóðir og sælir þegar við komum til baka.

Eftirfarandi frétt birtist á heimasíðu Kópavogsbæjar 2. janúar og vel við hæfi að hafa hana fyrstu frétt nýs árs hér á heimasíðu Kópavogsskóla.

Nemendur í grunnskólum í Kópavogi komu best út allra íslenskra nemenda í PISA-könnuninni þar sem lesskilningur fimmtán ára barna var mældur. Þeir eru einnig í hópi þeirra bestu í stærðfræði og náttúrufræði.  Frammistaða íslenskra skóla í PISA-könnuninni olli vonbrigðum. Slakur árangur í lesskilningi í samanburði við önnur OECD-lönd hefur verið mest í umræðunni. Upp á síðkastið hafa einnig birst fréttir um árangurinn í einstökum umdæmum úr skýrslu Námsmatsstofnunar um helstu niðurstöður PISA-könnunarinnar um Ísland. Þar segir að í lesskilningi séu þrjú skólaumdæmi markvert fyrir ofan landsmeðaltal, Kópavogur, Skagafjörður og Norðurþing.