Fréttir

Í seinustu viku kom rithöfundurinn Harpa Dís Hákonardóttir í heimsókn á skólasafnið og kynnti nýútkomna bók sína, "Fangarnir í trénu".

Harpa Dís sem er 18 ára, las úr bókinni fyrir nemendur í 4.-7. bekk.

Þetta er önnur bók höfundar, en áður hefur komið út bókin Galdrasteinninn sem margir nemendur þekkja.

Í desember hefur verið mikið um að vera á safninu.  Þá eru ljósin deyfð,  safnið skreytt og dúkar eru á borðum. Bekkir koma í heimsókn, hlusta á jólasögur og  fá kakó og piparkökur. Nemendur úr 7. og 8. bekkjum hafa lesið upp  jólasögur og jólavísur fyrir nemendur í 1.-6. bekk. Hafa þau öll staðið sig með prýði.

Dagana 8. og 9. desember voru svokallaðir þemadagar í skólanum. Að þessu sinni var ákveðið að vinna að verkefnum tengdum jólum. Yfirskriftin var "Jólalestin" og var nemendum skipt í hópa. Nemendur í 1. - 4. bekk gerðu dagatal fyrir alla mánuði ársins 2012. Myndirnar á dagatalinu voru margs konar s.s. klippimyndir, pappírsbrot, málaðar myndir o.fl. Í 5. -7. bekk var föndrað ýmislegt jólalegt. Búin voru til jólakort, origamijólaskraut, pappírshús klippt og skorin og gerðar kókoskúlur sem settar voru í skreyttar krukkur. Unglingastigið vann einnig ýmis jólaverkefni. Nemendur fóru í ratleik, föndruðu jólaskraut og kort og spiluðu ýmis skemmtileg spil. Þessir dagar voru mjög ánægjulegir og allir í góðu jólaskapi.

Þessa dagana er 7-V að læra allt um almenn brot. Í tilefni þessa voru bakaðar vöfflur í stærðfræðitíma og brotin skoðuð út frá þeim. Að lokum var vöfflunum skipt jafnt á milli allra og borðaðar með sultu og rjóma.

Fimmtudaginn 24. nóvember var haldin rýmingaræfing í skólanum. Nemendur og starfsfólk var ekki undirbúið fyrir æfinguna. Æfingin heppnaðist mjög vel og tók um þrjár mínútur að tæma húsið og eftir sjö mínútur var búið að yfirfara alla hópa hjá kennurum. Æfing sem þessi er nauðsynleg til þess að minna á öryggisatriði og fara yfir hlutverk allra við rýmingu.

Daginn eftir komu slökkviliðs- og sjúkraflutningsmenn í heimsókn í 3. bekk. Heimsóknin er árleg en börnin fræddust um eldvarnir og neyðarnúmerið 112. Börnin fengu síðan að skoða sjúkrabíl og slökkviliðsbíl.

Börnin í 3. bekk hafa undanfarið verið að læra um sólkefið. Nýlega gerðu þau sína eigin útgáfu af sólkerfinu og má sjá afraksturinn ef smellt er á myndina hér til hægri.

Í dag fékk 5. bekkur góða gjöf frá Stjörnuskoðunarfélagi Seltjarnarness. Skólinn fékk tvö eintök af nýjasta blaði félagsins og allir nemendur stjörnukort. Náttúrufræðikennarar barnanna afhentu kortin. Skólinn fékk einnig nokkur eintök að gjöf. Í fyrra fékk skólinn tvo stjörnukíkja frá félaginu. Þetta er einkar rausnarlegt og flott framtak hjá Stjörnuskoðunarfélaginu og þökkum við kærlega fyrir okkur. Ástæða er til þess að benda foreldrum á fróðlegan vef félagsins: www.stjornufraedi.is. Þar má meðal annars finna stjörnukort fjölskyldunnar. Á þessum árstíma er skemmtilegt að skoða himininn og  börn hafa yfirleitt mjög gaman að því. 

Hinn árlegi laufabrauðsdagur Foreldrafélags Kópavogsskóla verður laugardaginn 26. nóvember í matsal skólans og hefst kl. 10 og lýkur kl. 14. 10 stk. útflattar kökur til sölu á einungis 800 kr. Allir komi með skurðbretti,ílát undir steiktar kökur og laufabrauðsjárn eða eitthvað annað til að skera út með t.d. hníf og gaffal. Kaffisala og kökubasar á staðnum (fjáröflun fyrir 7. bekk).

Skólahljómsveit Kópavogs kemur kl. 11 og sér til þess að allir komist í jólaskapið.

Allir velkomnir með; ömmur, afar, frænkur og frændur.

Hlökkum til að sjá ykkur

Laufabrauðsnefndin

Í dag 16. nóvember á afmælisdegi Jónasar Hallgrímssonar, þjóðskálds okkar Íslendinga, var Dagur íslenskrar tungu haldinn hátíðlegur með dagskrá á sal skólans. Skólakór Kópavogsskóla söng, nemendur og kennarar kynntu íslenska rithöfunda og lesið var upp úr bókum þeirra. Einnig lásu nemendur frumsamin ljóð og sögur og sungu. Sigurlaug Ólöf Guðmundsdóttir kom frá Gjábakka, félagsmiðstöð aldraðra í Kópavogi og las nokkur ljóð eftir sig sjálfa. Þetta var vel heppnuð skemmtun og voru nemendur einstaklega prúðir að hlusta og taka þátt í því sem fram fór.

Kennarar í stærðfræði í 3. og 8. bekk hafa undanfarið verið að prófa sig áfram með samvinnu bekkjanna. Á dögunum komu nemendur í 3. bekk í heimsókn í 8. bekk. Nemendur reiknuðu saman og eldri nemendur aðstoðuðu þau yngri. Börnin höfðu gaman að því að sjá ólík viðfangsefni eftir aldri og samvinnan tókst mjög vel.

Þriðjudagurinn 8. nóvember er helgaður baráttunni gegn einelti. Af því tilefni var sérstaklega hugað að eineltismálum í skólanum í gær. Nemendur á mið- og elstastigi voru kallaðir á sal þar sem horft var á myndina" Einelti helvíti á jörð". Myndin byggir á viðtölum við þolendur eineltis og er áhrifamikil. Skólastjóri kom inn í myndina með umræður og staldraði við ákveðin atvik í myndinni til þess að ræða ýmsar hliðar á eineltinu. Yngri nemendur horfðu á myndina "Katla gamla" með sínum kennurum. Sú mynd fjallar einnig um einelti. Umsjónarkennarar unnu áfram með sína bekki og stjórnuðu umræðum í bekkjum um hvað einelti væri og hvernig við gætum komið í veg fyrir einelti í skólanum okkar.

Dagur sem þessi er nauðsynlegur til þess að vekja athylgi á því böli sem einelti er. Einelti má aldrei líðast. Við verðum að standa saman í því styrkja jákvæð samskipti og skapa samfélag þar sem einelti þrífst ekki. Hér að neðan má finna ýmsar gagnlegar netslóðir um fræðslu gegn einelti.

http://gegneinelti.is/

http://www.barnaheill.is/verndumborn/

http://heyrumst.is/

http://jerico.is

Á dögunum fóru nemendur úr 9. og 10. bekk sem eru í valhópnum  ,,Skólablað," í heimsókn niður á ritstjórnarskrifstofu DV  og  kynntu sér starf blaðamanna, prófarkalesara, setjara og fleiri. Heimsóknin var skemmtileg og fræðandi. Krakkarnir komu með hugmyndir um hvað þau vildu sjá í dagblöðum og voru þær margar og fjölbreyttar.

http://www.dv.is/frettir/2011/10/5/vilja-meira-sludur-um-geir-h-haarde/

6. bekkur fékk góða heimsókn í gær. Í bekkinn komu tveir íðjuþjálfar til þess að skoða skólatöskur barnanna. Þeir skoðuðu hvort töskurnar væru rétt stilltar en einnig var rætt um þyngd skólatöskunnar. Þetta var góð og gagnleg heimsókn.

Sú hefð hefur skapast í Kópavogsskóla að bjóða foreldrum barna í fyrsta bekk til sérstakrar kynningar á skólanum og skólastarfinu. Kynningin í ár fór fram 6. september sl. og fyrri hluti hennar var í samkomusal skólans. Þar ræddi Dýrleif Egilsdóttir námsráðgjafi um líðan barna í skóla og Guðmundur skólastjóri kynnti foreldrum uppeldisaðferðina Uppeldi til ábyrgðar en skólinn starfar samkvæmt þeirri hugmyndafræði. Síðan var foreldrum boðið í súpu og salat í starfsmannastofu skólans og þar gafst þeim tækifæri til að kynnast foreldrum annarra barna í árganginum. Eftir mat var haldið í bekkjarstofur þar sem Ermenga Björnsdóttir og Hulda Hrönn Ágústsdóttir umsjónarkennarar kynntu námskrána og vetrarstarfið. 

Í heimilisfræði í vikunni bjuggu börnin í 2. bekk til gómsæta grænmetiskarla. Drukkið var að sjálfsögðu vatn með. Segja má að morgunhressingin gerist nú varla hollari.

 

Vikuna 28. ágúst til 3. september fengu nemendur í 9. bekk nemendur frá Parkvejskolen í Birkerød í Danmörku í heimsókn. Heimsóknin var skipulögð af foreldrum í samvinnu við skólann en ein stúlkan í íslenska hópnum var í þessum skóla fyrir nokkrum árum.  Dönsku nemendurnir komu hingað til lands á sunnudegi og tóku íslensku nemendurnir á móti þeim ásamt foreldrum sínum.  Danirnir gistu hjá íslenskum jafnöldrum sínum og komu síðan með þeim í skólann á mánudeginum. Á þriðjudagsmorgni var síðan lagt af stað í ferðalag þar sem farið var hinn svokallaða „gullna hring" ásamt því að farið var í river rafting í Hvítá. Í lok dagsins  var  síðan haldið í Vindáshlíð þar sem krakkarnir nutu samveru og  gistu um nóttina.

Aðalfundur Foreldrafélags Kópavogsskóla

Fimmtudaginn 15. september nk. kl. 18.15 er boðað til aðalfundar foreldrafélags Kópavogsskóla.

Fyrir fundinum liggja hefðbundin aðalfundastörf sem eru skv. 4. gr. laga foreldrafélagsins eftirfarandi:

1) Stjórnin gefur skýrslu um starfsemi félagsins á liðnu starfsári.

2) Gjaldkeri leggur fram endurskoðaða reikninga til umræðu og samþykktar.

3) Lagabreytingar ef fyrir liggja tillögur um þær.

4) Ákvörðun tekin um félagsgjöld næsta árs.

Það voru sannkölluð brosandi andlit í heimilisfræði í 3. bekk síðustu tvær vikur. Börnin æfðu sig í að smyrja brauð og fengu síðan allskyns grænmeti og ávexti til þess að skreyta brauðið sitt með og búa til andlit. Sum börnin þorðu varla að gæða sér á brauðinu því þau vildu ekki skemma það sem þau höfðu gert. Með brauðinu gæddu börnin sér á heitu kakói sem þau höfðu búið til í sameiningu með aðstoð kennara.

Útivist verður hjá 2. bekk alla fimmtudaga í vetur. Nú þegar höfum við tvisvar farið út að leika okkur annað skiptið á leikvöllinn við Bjarnhólastíg og hitt skiptið gengum við niður í Hlíðargarð. Allir léku sér fallega saman í góðu veðri og skemmtu sér vel.

Kópavogsskóli  hefur ákveðið að taka þátt í Göngum í skólann, verkefni á vegum Íþrótta- og Ólympíusambands Íslands, Landlæknisembættisins, mennta- og menningarmálaráðuneytisins, Ríkislögreglustjóra, Umferðarstofu, Slysavarnarfélagsins Landsbjargar og Heimilis og skóla. Göngum í skólann verður sett miðvikudaginn 7. september og lýkur formlega með alþjóðlega Göngum í skólann deginum miðvikudaginn 5. október.

Þetta er í fimmta sinn sem verkefnið er haldið hér á landi og hefur þátttaka aukist jafnt og þétt. Megin markmið verkefnisins er að hvetja nemendur til þess að ganga eða hjóla til og frá skóla með því að auka færni nemenda til að ganga á öruggan hátt í skólann og fræða þau um ávinning reglulegrar hreyfingar. Að draga úr umferðarþunga, mengun og hraðakstri nálægt skólum. Auk þess er reynt að stuðla að vitundarvakningu fyrir vistvænan ferðamáta og

Skólakynningar/námskynningar fyrir foreldra verða sem hér segir:

2.-4. bekkur þriðjudaginn 6. september kl. 8:00 í stofum bekkjanna.

1. bekkur þriðjudaginn 6. september kl. 18:00 í sal skólans.

5.-7. bekkur miðvikudaginn 7. september kl. 8:00 í stofum bekkjanna.

8.-10. bekkur fimmtudaginn 8. september kl. 8:00 í stofum bekkjanna.

Skrifstofa Kópavogsskóla opnar að loknum sumarleyfum mánudaginn 8. ágúst. Þá koma starfsmenn, aðrir en kennarar, til starfa en kennarar hefja störf mánudaginn 15. ágúst. Nýjum nemendum sem fara í 2.-10. bekk er boðið til skólakynningar miðvikudaginn 17. ágúst kl. 15:00. Skólasetning  verður mánudaginn 22. ágúst sem hér segir:

2.-4. bekkur kl. 9:00

5.-7. bekkur kl. 10:00

8.-10. bekkur kl. 11:00

Nemendur í 1. bekk, ásamt foreldrum sínum koma í einstaklingsviðtöl við umsjónarkennara á skólasetningardaginn. Til viðtalsins verður boðað símleiðis.

Þriðjudaginn 7. júní var skólanum slitið. Skólaslit 1.- 6. bekkja voru kl. 10:00 og 7.- 9. bekkja kl. 11:00. Nemendur komu saman á sal skólans og sungu vorlag við undirleik Skarphéðins tónmenntakennara. Skólastjóri og deildastjórar þökkuðu nemendum samstarfið í vetur. Að lokum   fóru þeir í stofur og tóku á móti vitnisburði hjá umsjónarkennurum.

Útskrift 10. bekkinga var sama dag og að þessu sinni útskrifuðust 22 nemendur. Ólína Þorleifsdóttir aðstoðarskólastjóri stýrði samkomunni. Tónlistaratriði og ljóðalestur  voru flutt í upphafi og voru það útskriftarnemendur og tveir nemendur úr 9. bekk sem sáu um flutninginn. Skólastjóri ávarpaði nemendur og gesti og fulltrúi nemenda ávarpaði einnig samkomuna. Því næst voru afhent verðlaun fyrir góðan námsárangur. Skólaslitunum lauk með því að foreldrar 9. bekkinga buðu upp á frábærar veitingar. Dagurinn var skemmtilegur og við óskum nemendum velfarnaðar.

Nemendur í 8. bekk fóru á útivistardögum í gönguferð um Elliðaárdalinn með nesti og nýja skó. Ágætis göngutúr í fallegu umhverfi. Síðasta skóladaginn var svo farið í menningarferð í miðbæ Reykjavíkur og Þjóðmenningarhúsið heimsótt. Sýning um Jón Sigurðsson var skoðuð.

Haldið var fótboltamót fyrir börnin í 3. og 4. bekk miðvikudaginn 1. júní. Mikill áhugi var í bekkjunum og var skipt í stráka- og stelpudeild. Börnunum var síðan blandað í liðin á milli bekkja og árganga. Það fór aðeins að rigna á okkur en börnin létu ekki smá rigningu aftra sér og héldu ótrauð áfram. Allir stóðu sig með prýði jafnt innan sem utan vallar og heppnaðist dagurinn mjög vel.

Að þessu sinni var farið á norðanvert Kársnesið. Gengið meðfram ströndinni og í  fjöru vestan við Ora. Margt fallegt og fróðlegt varð á vegi okkar. Á leiðinni til baka gengum við fram á þennan líka fína leikvöll, sem á voru leiktæki sem minntu á skip. Myndirnar segja meira en mörg orð.

Þriðjudaginn 31. maí tóku nemendur í skólanum þátt í söfnun fyrir Unicef. Nemendur í 1.- 4. bekk fóru í alls konar þrautir á skólalóðinni og í íþróttahúsi. Nemendur í 5.- 9. bekk hlupu á hlaupabrautinni á Kópavogsvelli, spiluðu hafnabolta, fótbolta eða blak á Kópavogstúni og fóru í þrautir í Hlíðagarði. Nemendur í 10. bekk voru í skólaferðalagi.

Í gær þriðjudaginn 31. maí kom Magnús Stefánsson frá Maritasamtökunum og hélt fræðslufund með foreldrum nemenda 6. -10 bekkjar um vímuefnavarnir. Fundurinn var góður og þeir sem mættu fengu fræðslu um þá hættu sem beinist að börnunum okkar. Fyrir þá sem komust ekki viljum við benda á heimasíðu Maritasamtakanna en þar er að finna góðar upplýsingar fyrir foreldra. http://marita.is/

Fimmtudaginn 26. maí fengum við skemmtilega heimsókn og fræðandi. Bjarni pabbi Páls í 3. M kom í heimsókn og kenndi okkur hvernig á að kasta upp 3 boltum og keilum. Nú þarf bara að æfa sig. Síðan var farið í þrautaleiki og látbragðsleik. Allir höfðu gagn og gaman af. Á haustdögum er von á fleiri foreldrum.

Haldið var fótboltamót fyrir nemendur í 1. og 2. bekk mánudaginn 30. maí. Skipt var í 6 fótboltalið og var börnunum sem vildu taka þátt blandað í liðin. Krakkarnir stóðu sig með prýði jafnt innan sem utan vallar og heppnaðist dagurinn mjög vel. Veðrið lék við okkur og mátti sjá gleðina skína úr hverju andliti.

Fimmtudaginn 26. maí fórum við í 1-Þ og 1-U með strætó niður í miðbæ Reykjavíkur. Við tókum með okkur brauð og byrjuðum á að gefa fuglunum á tjörninni. Síðan var farið inn í Ráðhúsið og kortið af Íslandi skoðað. Eftir að hafa borðað nestið í Ráðhúsinu var farið á Austurvöll og að Alþingishúsinu. Á heimleiðinni gengum við framhjá Þjóðminjasafninu, Háskóla Íslands og tókum strætó aftur heim. Allir komu glaðir en mjög þreyttir í skólann.

Börnin í 2. bekk hafa unnið að verkefni í Fjölfærni tengt íslensku húsdýrunum. Börnin fóru meðal annars í sveitaferð eftir að hafa fræðst um hagi dýranna. Afrakstur barnanna má sjá á eftirfarandi myndum.

Nemendur í valgreininni íþróttir og útivist fóru í hjólaferðalag dagana 10. og 11. maí.  Hjólað var frá Kópavogsskóla að Elliðavatni þaðan inn í Heiðmörkina og þá að Lækjarbotnum og inn á Bláfjallaveg. Þaðan lá leiðin að skíðaskála Breiðabliks þar sem dvalist var um nóttina.  Nemendur og kennarar áttu  góða stund í að útbúa mat og hvílast fyrir átök næsta dags.  Að morgni 11. maí var farið í hellaskoðun og að loknum hádegisverði var haldið heim.  Veðrið var eins og best verður fyrir hjólreiðar, logn og blíða.  Allir nemendur stóðu sig vel. Þetta var skemmtileg ferð sem lifir í minningu þeirra sem fóru. Myndir frá ferðinni má sjá með því að smella á myndina hér til hliðar.

Föstudaginn 7. maí  vorum við með bangsadag í 1-U og 1-Þ. Bangsadagurinn kom í framhaldi af því að við vorum að tala um vináttu og að kunna að sættast ef eitthvað kæmi upp á í vinahópnum. Þessi dagur heppnaðist vel og fóru allir sáttir heim bæði börn og bangsar.

Fimmtudaginn 5. maí fórum við í 1.U og 1.Þ í heimsókn á Náttúrufræðistofu Kópavogs. Vel var tekið á móti okkur og við fengum góða leiðsögn um safnið.

Mánudaginn 9. maí fór 2. bekkur í sveitaferð. Sveitabærinn Miðdalur í Kjós var heimsóttur og undu börnin sér vel með dýrunum. Börnin fengu mjólk að drekka og snæddu nesti. Þau stoppuðu ekki lengi við að borða nestið því dýrin biðu. Allir skemmtu sér mjög vel og börnin voru alls ekki tilbúin að fara heim því það var svo gaman.

Á fimmtudaginn 5. maí fengu krakkarnir í 1. bekk góðar gjafir frá Kiwanis hreyfingunni í Kópavogi. Þetta eru forláta reiðhjólahjálmar sem Jón Olgeirsson húsvörður í skólanum afhenti, en hann er félagi í Kiwanis. Árlega gefa Kiwanisfélagar um allt land öllum nemendum í 1. bekkjum á landinu reiðhjólahjálma. Þeim eru hér með færðar bestu þakkir fyrir. Smellið á myndina hér til hliðar til að sjá fleiri.

Í dag 15. apríl, voru haldnar árshátíðir yngsta- og miðstigs. Fjölbreytt skemmtiatriði voru frá öllum bekkjum. Flutt voru leikrit byggð á gömlum ævintýrum, sungið og sýndar tískusýningar. Allir skemmtu sér vel enda skemmtiatriðin flytjendum til sóma. 

Krökkunum í áttunda bekk var boðið í heimsókn í danska sendiráðið á dögunum. Það var vel tekið á móti þeim og þau leyst út með   bókagjöf. Heimsóknin var ánægjuleg í alla staði.

Allir 8. bekkingar fóru í menningarferð í Norræna húsið. Þar tóku á móti þeim forstöðukonan sem er  Finni og Dani sem er búsettur á Íslandi. Krakkarnir skoðuðu bókasafnið og fræddust um verk Alvars Aaltos. Tilgangur þessarar ferðar var að kynnast ýmiss konar siðum, hönnun, listum og bókmenntum frá Norðurlöndunum. Nemendurnir og bekkjastjórnir eru í samvinnu við kennara að undirbúa ferð til Danmerkur vorið 2012 og er þetta einn liður í þeim undirbúningi.

Vilt þú vekja athygli á verðugu verkefni?

Foreldraverðlaun Heimilis og skóla 2011 verða afhent í Þjóðmenningarhúsinu þriðjudaginn 24. maí næstkomandi. Óskað er eftir tilnefningum til Foreldraverðlauna 2011 frá einstaklingum, félögum eða hópum sem vilja vekja athygli á vel unnum verkefnum, sem stuðla að eflingu skólastarfs og jákvæðu samstarfi heimila, skóla og samfélagsins.

Tilnefningar berist á rafrænan hátt með því að fylla út eyðublað hér á heimasíðu samtakanna www.heimiliogskoli.is. Síðasti skiladagur tilnefninga er 28. apríl 2011.

Í dag fengum við ánægjulega heimsókn frá leikskólum, en þetta voru nemendur sem hefja skólagöngu í 1. bekk í haust. Einnig komu nokkrir krakkar sem fara í aðra skóla. Leikskólakennarar fylgdu hópunum ásamt nokkrum foreldrum. Deildarstjóri tók á móti gestunum og sýndi þeim skólann. Síðan var skólasafnskennarinn með sögustund á bókasafninu og að lokum fengu allir safa og kleinur. Mjög skemmtilegt var að taka á móti eftirvæntingarfullum hópnum.

Síðustu vikur hefur Heiðar Ástvaldsson danskennari verið með dansnámskeið fyrir nemendur í 1.-3. bekk. Hver bekkur hefur æft einu sinni í viku og eru framfarir miklar. Námskeiðunum lauk á þriðjudaginn 22. mars með danssýningum fyrir foreldra og ættingja barnanna. Mikill fjöldi gesta var á sýningunum og stóðu nemendur sig með mikilli prýði.

Nú er ánægjulegum uppbrotsdögum lokið, bolludegi, sprengidegi og öskudegi. Á bolludaginn unnu nemendur stærðfræðiverkefni. Öllum nemendum var skipt í hópa þvert á aldur og unnu þeir ýmis verkefni sem tengdust ýmsum námsgreinum. Eldri nemendur aðstoðuðu yngri og ánægjulegt var að sjá hve vel sú samvinna gekk. Á sprengidaginn var Heiðar Ástvaldsson danskennari með danskennslu fyrir alla nemendur í þremur hópum. Ýmislegt fleira var gert s.s. bingó, grímugerð og spurningakeppni. Í dag öskudag var ball fyrir nemendur þar sem fulltrúar úr öskudagsnefnd foreldra aðstoðuðu. Kunnum við þeim bestu þakkir fyrir. Skarphéðinn tónmenntakennari stjórnaði marseringu um skólann með trommuslætti. Eftir ballið var boðið upp á popp og bíó eða föndur. Dagurinn var sérstaklega skemmtilegur og gaman að sjá hve margir mættu í búningum. Myndir frá þessum dögum má sjá á myndasíðu hér til hliðar.

 

Fimmtudaginn 3. mars var hið vinsæla skólahreystimót haldið í Smáranum.  Guðmundur Högni Hilmarsson bjargaði málum á síðustu stundu þegar upp komu meiðsli í hópnum sem búinn var að æfa. Hann keppti svo til óundirbúinn í upphífingum og dýfum og stóð sig vel.  Petrea Björt Sævarsdóttir keppti í armbeygjum og hreystigreip og Emilía Björg Atladóttir og Orri Sigurður Ómarsson kepptu í þrautabraut.  Hópurinn lauk keppni í 10.sæti af 12. liðum. 

Inn­ritun 6 ára barna (fædd 2005) fer fram í grunn­skólum Kópa­vogs mánudaginn 7. og þriðjudaginn 8. mars.  Sömu daga fer fram inn­ritun nemenda sem flytjast milli skóla­hverfa og þeirra sem flytja í Kópa­vog eða koma úr einka­skólum.Haustið 2011 munu skólar hefjast með skólasetningardegi mánudaginn 22. ágúst.

Sérstök athygli er vakin á því að um­sóknar­frestur um heimild til að stunda nám í einka­skólum eða grunn­skólum annarra sveit­ar­f­é­l­aga er til 1. apríl og skulu umsóknir berast fræðslu­skrif­stofu rafrænt á eyðublaði sem er á heimasíðunni www.kopavogur.is. Sækja þarf um að nýju fyrir nemendur, sem nú eru í slíkum skólum, ef gert er ráð fyrir að þeir verði þar næsta vetur.

Sigurvegarar í stóru upplestrarkeppninni í Kópavogsskóla voru að þessu sinni þeir Runólfur Bjarki Arnarson 7.Y og Hlynur Bjarnason 7.X. Varmenn eru Elín Sóley Hrafnkelsdóttir 7.Y og Alma Maureen Vinson 7. Y. Fengu þau öll bókagjöf að viðurkenningu. Allir keppendur fengu einnig viðurkenningaskjal fyrir þátttöku sína.

Allir keppendur stóðu sig með prýði. 6. bekk var að venju boðið að hlýða á keppnina og einnig voru nokkrir foreldrar í salnum. Þeir sem kepptu til úrslita þetta árið voru: Alma Maureen Vinson, Ágúst Pálmason Mortens, Elín Sóley Hrafnkelsdóttir, Flóki Larsen, Hafsteinn Níelsson, Runólfur Bjarki Arnarson, Ásta Sóley Júlíusdóttir, Guðrún Embla Eiríksdóttir, Hlynur Bjarnason, Iðunn Rún Kristjánsdóttir, Védís Mist Agnadóttir og þórhildur Björgvinsdóttir. Lokakeppnin í Kópavogi fer fram í Salnum 8. mars kl. 16:30 og eru allir velkomnir. Við óskum okkar nemendum góðs gengis.

Framundan eru skemmtilegir dagar í skólanum sem bera yfirskriftina , Gaman saman. Við ætlum að brjóta upp kennslu í þrjá kennsludaga og breyta út af venjulegri stundaskrá.

Mánudaginn 7. mars, bolludag, helgum við stærðfræði en á dögunum var DAGUR STÆRÐFRÆÐINNAR. Þá ætlum við að skipta nemendum í hópa og vinna ýmis stærðfræðiverkefni í fjórar kennslustundir. Eftir það verður kennsla samkvæmt stundaskrá. Nemendur mega koma með bollur í nesti.

Þriðjudaginn 8. mars verður ýmislegt skemmtilegt gert t.d. farið í spurningakeppni, danskennslu, bingó, útbúnar grímur og fleira. Skóla lýkur kl. 13:15.

Miðvikudaginn 9. mars, öskudag, verður grímuball og fleira skemmtilegt gert. Hvetjum nemendur til að mæta í öskudagsbúningum. Boðið verður upp á popp og má koma með safa að heiman. Skóla lýkur kl. 12:00.

Nemendur 6.V heimsóttu Listasafn Reykjavíkur - Kjarvalsstaði mánudaginn 28. febrúar.  Skoðuð voru nokkur þekktustu málverk meistara Kjarvals (1885-1972), en hann hét fullu nafni Jóhannes Sveinsson Kjarval. Einnig skoðuðu nemendur nokkur verk íslenskra listamanna sem sýnd hafa verið á Feneyjatvíæring, sem haldin er annað hvert ár í Feneyjum á Ítalíu

Vetrarleyfi verður í öllum grunnskólum í Kópavogi fimmtudaginn 24. og föstudaginn 25. febrúar.

Skólaráð Kópavogsskóla boðar til opins fundar þriðjudaginn 22. febrúar kl. 18:00 - 19:30 í sal skólans.

Dagskrá:

• Skólaráð og hlutverk þess
• Nám og þróunarstarf í Kópavogsskóla
• Hvaða áhrif hafði umræðan að leggja Kópavogsskóla niður á aðila skólasamfélagsins?
• Breytingar í Kópavogsskóla vegna fjárhagsáætlunar 2011

Allir foreldrar eru hvattir til þess að mæta á fundinn og láta sig þessi mál varða.

Fimmtudaginn 17. febrúar verður starfsdagur kennara, nemendur mæta ekki þann dag. Föstudaginn 18. febrúar verða foreldraviðtöl þar sem nemendur fá afhentan vitnisburð fyrir vetrarönn. Tímasetning viðtala hefur verið send heim með nemendum. Dægradvöl verður opin báða dagana fyrir skráða nemendur.

Föstudaginn 4. febrúar ákváðu kennarar 1. og 2. bekkjar að nýta snjóinn og börnin fengu að koma með snjóþotur þennan dag. Bæði börnin og kennararnir skemmtu sér konunglega eins og sést á eftirfarandi myndum.

Fimmtudaginn 3. febrúar  fóru nemendur  3. bekkjar B og M í heimsókn í  Mjólkursamsöluna. Lagt var af stað með strætó kl. 9.00. Ferðin reyndist heilmikið ferðalag og ævintýri.  Margt fróðlegt og skemmtilegt var að sjá í Mjólkursamsölunni og boðið var upp á ís, mjólk, kleinur og smákökur. Nemendur voru komnir aftur í skólann kl. 12:00.

Nú stendur yfir námskeið í dansi hjá 1.- 3. bekk, en það hófst 11. janúar. Danskennari er Heiðar Ástvaldsson. Hver bekkur fær eina kennslustund á viku í 10 skipti alls. Krakkarnir eru fljótir að læra helstu sporin og gaman er að sjá hvað þeim fer mikið fram með æfingunni. Hér til hliðar eru myndir af kátum krökkum í danstímum.

 

Mánudaginn 24. janúar fóru nemendur 6. V í Hafnarborg í Hafnarfirði. Skoðaðar voru tvær sýningar, annars vegar ,,Kjarvalar" Stefáns Jónssonar (f. 1964) á  þrívíðum endurgerðum af málverkum Jóhannesar Sveinssonar Kjarvals (1885-1972). Verkin eru unnin í ýmis efni s.s. steinsteypu, mósaíkflísar, prjónagarn og glerflöskur en eiga það öll sameiginlegt að endurgera náttúruna í olíumálverkum Kjarvals.

Hins vegar sáu nemendur sýningu Eiríks Smith (f. 1925) ,,Brot úr náttúrunni -abstraktverk 1957 - 1963" þar sem listamaðurinn glímir við form og liti náttúrunnar í málverkum sínum á  áhrifamikinn hátt.

Í dag kom til okkar Þorgrímur Þráinsson rithöfundur og las upp úr nýútkomnum bókum sínum og spjallaði við nemendur. Fyrir nemendur í 4. - 6. bekk las hann úr bókinni "Ertu Guð afi"? Og fyrir nemendur í 7. - 10. bekk úr bókinn "Þokan". Allir hlustuðu af athygli enda er Þorgrímur frábær lesari og bækurnar mjög spennandi og skemmtilegar. Eru honum færðar kærar þakkir fyrir þessa ánægjulegu stund.

Ef óveður geisar er meginreglan sú að skóli er opinn. Foreldrar þurfa að meta sjálfir hvort þeir senda börn sín í skólann eða ekki. Viðbrögð við óveðri má finna undir Tilkynningar til hægri á síðunni og foreldrar eru beðnir að kynna sér þau.