Skólinn

Skólaárið 2012- 2013 eru um 330 nemendur í Kópavogsskóla í 19 bekkjardeildum 1. - 10. bekkjar. Skólastjóri er Guðmundur Ó. Ásmundsson. Aðstoðarskólastjóri og deildarstjóri fyrir 6. - 10. bekk er Ólína Þorleifsdóttir. Deildarstjóri fyrir 1. - 5. bekk er Gerður Helgadóttir.

Kennsla hefst klukkan 8:00 og lýkur hjá þeim sem lengst eru um klukkan 15:00.

Skrifstofa skólans er opin frá 07:45- 16:00 mánudaga til fimmtudaga og á föstudögum frá 07:45 - 14:45, frá miðjum ágúst fram að miðjum júní. Skólaritari er Elín Hrefna Kristjánsdóttir.

Söguágrip

Kennsla hófst í fyrsta áfanga Kópavogsskóla miðvikudaginn 12. janúar 1949. Í þessum fyrsta áfanga skólahússins voru sex almennar kennslustofur og tvær sérgreinastofur. Þar býr mikil saga enda var skólahúsnæðið lengi vel nýtt sem félagsheimili sveitarfélagsins. Þar voru haldnir almennir borgarafundir og dansleikir auk þess sem guðsþjónustur fóru þar fram allt til þess tíma að Kópavogskirkja var vígð í desember 1962. Leikfélag Kópavogs hélt ennfremur sínar fyrstu leiksýningar í Kópavogsskóla.  

Í Kópavogsskóla voru um tíma skrifstofur sveitarfélagsins og áhaldageymsla. Héraðslæknir hafði þar aðstöðu og ýmsar aðrar stofnanir hófu þar starfsemi sína s.s. Bókasafn Kópavogs, Kársnesskóli, Gagnfræðaskóli Kópavogs, Digranesskóli og Menntaskólinn í Kópavogi.

Skólastjórar Kópavogsskóla hafa verið Guðmundur Eggertsson (1948-1949), Frímann Jónasson (1949-1964), Magnús Bæringur Kristinsson (1964-1977), Óli Kr. Jónsson (1977-1990)  og Ólafur Guðmundsson (1990-2006). Núverandi skólastjóri tók við stjórn Kópavogsskóla 1. ágúst 2006.