Mat á skólastarfi

Með Lögum um grunnskóla nr. 91/2008 er skólum gert að meta allt skólastarf með kerfisbundnum hætti. Matið er tvíþætt, annars vegar innra mat sem er það kerfi sem skólinn setur sjálfur upp  til að meta sem flesta þætti í starfi sínu, og hins vegar ytra mat sem er þá mat utanaðkomandi aðila sem skólinn fær til verksins. Í lögunum kemur fram að Menntamálaráðuneytinu sé ætlað að framkvæma ytra mat á skólum á fimm ára fresti og meta þá sjálfsmatsaðferðir skólanna.

Það kerfi sem varð fyrir valinu hjá Kópavogsskóla er danskt og nefnist Siðferðileg reikningsskil (Det etiske regnskab). Það byggir á átta þrepa hringferli sem felur í sér símat. Kynning á kerfinu hafði staðið í rúmt ár meðal starfsmanna, foreldraráðs og foreldrafélags þegar formlega var ákveðið 12. febrúar 1998 að innleiða kerfið í skólastarf Kópavogsskóla. Haustið 1998 voru myndaðir hagsmuna- og umræðuhópar innan skólasamfélagsins, þrír hópar starfsmanna, tveir hópar foreldra og tveir hópar nemenda til að fjalla um væntingar og viðhorf til skólastarfsins. Gögn frá þessum hópum voru síðan notuð til að semja sérstaka spurningalista fyrir hvern hóp og listarnir sendir út vorið 1999.

Niðurstöður lágu fyrir í byrjun skólaárs 1999-2000 og út frá þeim var horft til sex gilda sem unnið er út frá. Gildin sex eru: a)jákvæður starfsandi, b)agi í framkomu og vinnubrögðum, c)verkefni taki mið af hæfni og getu einstaklingins, d)gagnkvæm virðing ríki í samskiptum, e)virk samvinna sem byggist á ábyrgð skólaþegnanna og f)gagnkvæmt upplýsingastreymi milli heimila og skóla og innan skóla. Sjá nánar í Gildisgrunnur Kópavogsskóla

Spurningalistar voru aftur sendir nemendum, foreldrum og starfsmönnum vorið 2004 og í byrjun árs 2009. Niðurstöður liggja nú fyrir og þær er hægt að nálgast hér. Athugið að skjalið er mjög stórt.

Verkefnið hefur hlotið styrki frá Kópavogsbæ, Þróunarsjóði grunnskóla, Verkefna- og námsstyrkjasjóði KÍ, Nordskol og Vísindasjóði Gæðastjórnunarfélags Íslands.

Stýrihópur undir stjórn Ólínu Þorleifsdóttur aðstoðarskólastjóra hefur umsjón með innra mati skólans og skipulagi þess.