Samstarf við önnur skólastig

Til að efla tengsl leikskóla og grunnskóla var í samvinnu stjórnenda sett upp skipulag til að auðvelda skil skólastiganna fyrir nemendur. Nemendur 1. bekkjar fara að hausti í heimsókn í leikskólann sem þeir komu úr og væntanlegir nemendur koma í heimsókn á aðventunni og syngja jólasöngva á sal með nemendum 1. bekkjar. Á vorönn koma leikskólanemendur í heimsókn og deildarstjóri yngra stigs sýnir þeim skólahúsnæðið. Þeir fá sérstaka kynningu á Dægradvöl og sögustund á bókasafni. Þeim nemendum sem eru ekki í leikskóla er boðið að vera með. Foreldrum er boðið á skólakynningu í maí þar sem upphaf skólagöngunnar er kynnt og rætt við foreldra um væntingar þeirra til hennar. Væntanlegir nemendur koma í ,,kennslustundir" í skólann þar sem þeir skoða stofuna sína og hitta kennarann (ef sú ákvörðun liggur fyrir).  Starfsfólk leikskólans kemur með börnunum og einnig foreldrar barna sem ekki eru vistuð á leikskóla.

Börn af leikskólanum Kópahvoli hafa aðgang að íþróttahúsi og bókasafni Kópavogsskóla en leikskólinn er staðsettur við lóðamörk Kópavogskóla. Það er liður í að efla samstarfið á milli skólastiganna.

Tengsl við framhaldsskóla

Grunnskólum er skylt að bjóða nemendum 9. og 10. bekkja að velja námsgreinar sem nemur 10 kennslustundum á viku. Í Kópavogsskóla má skipta valmöguleikum nemenda í þrjá flokka. Í fyrsta lagi geta nemendur fengið skipulagt tómstundastarf og íþróttaiðkun metna ef skrifleg lýsing og samþykki liggur fyrir frá viðkomandi þjálfara eða leiðbeinanda. Í öðru lagi námsgreinar sem kenndar eru af kennurum skólans hér í skólanum. Í þriðja lagi framhaldsskólaáfanga sem kenndir eru í viðkomandi framhaldsskóla og þar er mest samstarf við Menntaskólann í Kópavogi.